वर्धा- हिंगणघाट येथील वर्धमान टेक्स्टाईल कापडाच्या दुकानाला आज पहाटे आग लागल्याने खळबळ उडाली. यात अग्निशामक दलाच्या वतीने आग विझवताना सिलेंडरचा स्फोट झाला. यात सहा जण जखमी झाले. जखमीमध्ये अग्निशामक दलाच्या दोन कर्मचाऱ्यांचा समावेश आहे. सध्या आग आटोक्यात आली आहे. खाली कापड दुकान आणि वर घर असल्याने कुटुंबातील अनेकांनी पहिल्या माळ्यावरून बाल्कनीच्या बाहेर टिनाच्या शेडवर उड्या मारत स्वतःचा जीव वाचवला.
शॉर्ट सर्किटमुळे ही आग लागल्याचे सांगितले जात आहे. यात कुटुंब गाढ झोपेत असताना तीन वाजताच्या सुमारास आग लागली. शेजाऱ्यांना आग दिसताच त्यांनी अग्निशामकला बोलावले. त्यानंतर आग विझवण्याचे प्रयत्न सुरू झाले. यावेळी आगीने रौद्ररूप धारण केले होते. यात घरातील तापमान प्रचंड वाढल्याने आग विझवताना सिलेंडरचा स्फोट झाला. यात अग्निशामक दलाचे दोन कर्मचारी जखमी झाले.
आगीमुळे कुटुंबातील चार जण जखमी झाले आहेत. जखमींना रुग्णालयात पाठवण्यात आले असून त्यांच्यावर उपचार सुरू आहे. जखमींमध्ये सुनील पितलिया, पत्नी कोमल पितलिया, मुलगा, मुलगी यासह अग्निशामक दलाचे नितीन जंगले व गणेश सायंकार हे सहा जण जखमी झाले असल्याची माहिती मिळाली आहे. सध्या या आगीवर नियंत्रण मिळवण्यात आले आहे. आगीमुळे दुकानातील साहित्य जळून खाक झाले आहे. यात साधारण ५० लाखाच्या घरात नुकसान झाले असल्याचे बोलले जात आहे.
हेही वाचा- वर्ध्यात दुचाकीला अपघात; माय-लेकीचा मृत्यू; पती गंभीर
