ठाणे - मुरबाड तालुक्यातील बहुतेक भागातील विहिरींनी तळ गाठला असून येथील गावकऱ्यांना भीषण पाणीटंचाईला सामोर जावे लागत आहे. येथील गावकऱ्यांवर पाणी विकत घेण्याची वेळ आली आहे. त्यामुळे आतातरी मायाबाप सरकार पाणी देणार का? असा संतप्त सवाल मुरबाड तालुक्यातील पाणी टंचाईग्रस्त महिलांनी उपस्थित केला आहे.
मुरबाड तालुक्यात बहुंताश ठिकाणी धरण-बंधारे आहेत. मात्र, या धरण-बंधारे परिसरातील गावांना हंडाभर पाण्यासाठी महिलांना वणवण करावी लागत आहे. मुरबाडमधील पाडाळे धरणापासून अवघ्या काही अंतरावर असणाऱ्या खोपीवली गावातील विहीरींनी तळ गाठला आहे. विषेश म्हणजे धरणासाठी ज्या गावातील गावकऱ्यांच्या जमिनी गेल्या आहेत. त्याच गावांना पिण्यासाठीसुद्धा पाणी मिळत नसल्याने, महिलांनी नाराजी व्यक्त केली आहे.
तर मुरबाड तालुक्यातील उंबरवाडी, झाडघर, साकुर्लीवाडी, कुडशेत या आदिवासी वाड्या पाड्यांमध्येही पाण्याची भीषण टंचाई सुरू आहे. काही ठिकाणी दर ३-४ दिवसाला पंचायत समितीमार्फत पाण्याचा १ टँकर विहरीमध्ये टाकला जातो. मात्र, हे पाणी गावातील लोकांना पिण्यासाठीही पुरत नसल्याने दररोज टँकरने पाणी पुरवठा व्हावा, अशी मागणी नागरिकांकडून होत आहे.
- शहापूर तालुक्यात पाणी योजनेचे तीनतेरा
शहापूर तालुक्यातील पाटोळपाडा या गावासाठी २००७-०८ मध्ये ५१.४३ लाखांच्या पाणी योजनेचे काम अर्धवट ठेवून कंत्राटदाराने गावकऱ्यांना पाणीटंचाईच्या दरीत ढकलले आहे. या परिसरातील पाणी योजना भातसा पाणलोट क्षेत्रात असूनही विहिरीवर राबवण्याचा घाट घातला जात आहे. त्यामुळे पाणीटंचाई दूर होण्याचे स्वप्न अधांतरी आहे. जानेवारीतच विहिरी कोरड्या पडत असल्याने पाणीच आले नाही. संपूर्ण रात्रभर महिलांना पाण्यासाठी जागे राहावे लागत आहे. कूपनलिकांमधील पाणी संपले असून नागरिकांना ३ किमी अंतरावर दऱ्या-खोऱ्यामधून भातसा पाणलोट धरणक्षेत्रात पाणी आनण्यासाठी जावे लागत आहे.
- लोकशाहीत पाण्याचा हक्क नाही का ? संतप्त आदिवासींचा सरकारला सवाल
शहापूर तालुक्यातील भातसा धरणक्षेत्रात असणाऱ्या अतिदुर्गम भाग म्हणून समजल्या जाणाऱ्या वेळूक ग्रामपंचायत हद्दीतील पाटोळपाडा, तेलमपाडा परिसरातही भीषण पाणी टंचाई आहे. येथे २ कूपनलिका, २ विहरी आहेत. मात्र, पाण्याच्या सगळ्या व्यवस्थेने तळ गाठल्याने आदिवासी पाड्यातील तेलमपाडा येथील महिलांना पुरुषांच्या मदतीने ४ टेकड्या पार करून भातसा धरणक्षेत्रात उतरून पाण्याची व्यवस्था करावी लागत आहे. लहान मुलाबाळांना घरी ठेवून संपूर्ण दिवस पाण्यासाठी खर्च करावा लागत आहे. पुरुषांनाही पाण्यासाठी वणवण करावी लागत असल्याने रोजगार बुडत आहे. त्यामुळे पोट कसे भरायचे ? हा यक्षप्रश्न आदिवासींना पडला आहे.
