ठाणे - भिवंडी शहरात मोठ्या प्रमाणात नशेबाज गुन्हेगारांचा वावर वाढला आहे. त्यामुळे त्यावर आळा बसावा म्हणून पोलिसांनी कंबर कसली आहे. त्यातच शहरात नशेचा मोठ्या प्रमाणात गोरखधंदा करणाऱ्या दोघा तस्करांना शांतीनगर पोलिसांनी बेड्या ठोकल्या आहेत. या तस्करांकडून नशेसाठी वापरात येणारे कफ सिरप, गोळ्यांसह मॅफेड्रॉन (एमडी) असा लाखो रुपयांचा अमली पदार्थांचा साठा हस्तगत करण्यात पोलिसांना यश आले आहे. अशरफ इजाज अहमद अन्सारी (रा. भिवंडी) आणि मोहम्मद अली इरशाद अली कुरेशी (रा. वर्तकनगर, ठाणे) अशी अटक केलेल्या तस्करांची नावे आहेत.
नशेसाठी वापरणाऱ्या कफसिरपच्या 960 बाटल्या जप्त
कफ सिरप व गोळ्या विक्रीसाठी दोघेजण येणार असल्याची माहिती शांतीनगर पोलीस ठाण्याचे वरिष्ठ पोलीस निरीक्षक शितल राऊत यांना मिळाली. त्यानुसार, आपल्या वरिष्ठांना याबाबत माहिती देत कारवाई करण्यासाठी पोलीस निरीक्षक (गुन्हे) नितीन पाटील यांच्या नेतृत्वाखाली पोलीस उप निरीक्षक रवींद्र पाटील, निलेश जाधव, भोलासो शेळके, रवींद्र चौधरी, सुशील इथापे, रिजवान सैय्यद, तुषार वडे, प्रसाद काकड, किरण मोहिते, दीपक सानप, अमोल इंगळे, किरण जाधव, रवी पाटील, श्रीकांत पाटील या पथकाने खंडूपाडा येथील बाबा हॉटेल परिसरात सापळा रचला. तेथे दुचाकीवरून आलेल्या संशयित अशरफ इजाज अहमद अन्सारी यास ताब्यात घेतले.
नशेसाठी वापरल्या जाणाऱ्या Acan - 1 गोळ्या जप्त
त्यानंतर त्याची झडती घेतली असता त्याच्याजवळ Phencyrex या कफ सिरपच्या 240 बाटल्या व Acan - 1 या नशेसाठी वापरल्या जाणाऱ्या बटन गोळ्या आढळून आल्या. आरोपीस ताब्यात घेत कसून चौकशी केली. त्याच्याकडून नशेसाठी वापरणाऱ्या कफ सिरपच्या एकूण 960 बाटल्या हस्तगत करण्यात आल्या.
6 लाख 44 हजाराचे अमली पदार्थ जप्त, गुन्हा दाखल
भिवंडी शहरातील भादवड-पोगाव पाईपलाईन रस्त्यावर मॅफड्रिन घेऊन येणाऱ्या संशयिताबाबत पोलिसांना माहिती मिळाली. त्यानंतर पोलिसांनी सापळा रचून मोहम्मद अली इरशाद अली कुरेशी याला ताब्यात घेतले. चौकशी केल्यावर त्याच्याकडे 36 हजार रुपये ग्रॅम असणारे 18 ग्रॅम मॅफड्रिन अमली पदार्थ जप्त करण्यात आले. त्याची एकूण किंमत 6 लाख 44 हजार रुपये असल्याचे बोलले जात आहे. ही संपूर्ण कारवाई पोलीस उपायुक्त योगेश चव्हाण, सहाय्यक पोलीस आयुक्त प्रशांत ढोले, वरिष्ठ पोलीस निरीक्षक शीतल राऊत, पोलीस निरीक्षक किरणकुमार काबाडी यांच्या मार्गदर्शनाखाली करण्यात आली. दरम्यान, दोन्ही आरोपींविरोधात गुन्हा दाखल करण्यात आला आहे.
हेही वाचा - वीर धरणावर मद्यपान करत हवेत गोळीबार करणाऱ्या ९ जणांना अटक
