ठाणे - भरधाव ऑईल टँकर धावणाऱ्या चारचाकीवर उलटल्याने झालेल्या अपघातात तिघे गंभीर जखमी झाले आहे. हा अपघात गायमुख-घोडबंदर रस्त्यावर आज (दि. 27 सप्टेंबर) मध्यरात्री झाला आहे. अपघात इतका भीषण होता की, टँकरचा पुढील भाग निसटून दुभाजकावरून रस्त्याच्या दुसऱ्या बाजुला गेला तर चारचाकी वाहनाचेही मोठे नुकसान झाले आहे. या अपघातामुळे ठाणे-घोडबंदर-अहमदाबाद (गुजरात) या मार्गावर मोठी वाहतूक कोंडी झाली आहे.
याबाबत सविस्तर वृत्त असे की, ठाणे ते मुंबई या रस्त्यावर चालकाचा ताबा सुटल्याने एक भरधाव टँकर धावत्या चारचाकीवर उलटला. यात चारचाकीसह वाहनातील प्रवासी टँकरखाली दबले गेले होते. अपघाताची माहिती मिळताच ठाणे व मिरा-भाईंदर महापालिकेचे अग्निशमन दल, पोलीस प्रशासन व बचाव पथक घटनास्थळी पोहोचले. शर्थीचे प्रयत्न केल्यानंतर चारचाकी वाहनाला टँकरखालून काढण्यास पथकाला यश आले. वाहन चालक विनोद खरात (वय 30 वर्षे), पांडूरंग पाटील (वय 45 वर्षे) व सृष्टी पाटील (वय 18 वर्षे), असे गंभीर जखमींची नावे आहेत. जखमींना उपचारासाठी तात्काळ मिरारोड येथील एका खासगी रुग्णालयात पाठविण्यात आले आहे.
दोन्ही मार्गावरील वाहतूक ठप्प
या अपघातामुळे रस्त्यावर ऑईल पसरले आहे. तसेच एका मार्गावर टँकरचा मागील भाग तर दुसऱ्या मार्गावर टँकरचे दर्शनी भाग उलट्याने दोन्ही बाजुचे रस्तेही बंद झाले आहे. यामुळे ठाणे व मुंबई या दोन्ही मार्गावरील वाहतूक पूर्णपणे ठप्प झाल्याने वाहनांच्या लांबच लांब रांगा लागल्या आहेत. पोलिसांनी क्रेनच्या सहयाने टँकर सरळ करुन चारचाकी वाहनाला बाहेर काढले असून वाहतूक सुरळीत करण्याचा प्रयत्न पोलीस करत आहेत.
हेही वाचा - ठाणे : महिला पोलीस कर्मचारी ऑस्ट्रेलियातील भारतीय दूतावासात सुरक्षा अधिकारी पदावर
