ठाणे - ठाण्यातील भाजपचे नगरसेवक विलास कांबळे आणि वाद काही नवा विषय नाही. आता त्यामध्ये नव्या घटनेची भर पडली आहे. बारमध्ये झिंग झिंग झिंगाट गाण्यावर नाचतानाचा त्यांचा व्हिडिओ बाहेर आला आहे. स्वत:ला सुसंस्कृत पक्ष म्हणवून घेणाऱ्या भाजप पक्षाचे नेते जर सार्वजनिक जीवनात असे वागत असतील तर हे धक्कादायक आहे. विलास कांबळे यांनी याआधी ठाणे महानगर पालिकेचे स्थायी समितीचे अध्यक्ष पद देखील भूषविले आहे.
नगरसेवक विलास कांबळे अनेकदा वादात सापडले आहेत. २०१७ साली पालिका निवडणुकीच्या आधी प्रभागातील अनेक नागरिकांना सहलीला घेऊन जाऊन त्यांची मते मिळवण्याचा प्रयत्न केला. बस मालकांचे लाखो रुपयांचे बिल दिले नाही याबाबत बस मालकाने पोलिसांकडे तक्रारी केल्या होत्या. तसेच बारमध्ये तोडफोड केल्याचेही प्रकरण जुने नाही. आता तर चक्क झिंग झिंग झिंगाट गाण्यावर दारू पिऊन नाचताना ते दिसत आहेत. आपण नगरसेवक आहोत हे विसरून ते बारमध्ये गाचगाणे करत आहेत.
चार महिन्यांपूर्वी विलास कांबळे यांनी नंदादीप लेडीज बारमध्ये गायक प्रदीप गायकवाड यांना धक्काबुक्की करत जीवे मारण्याची धमकी दिली होती. याप्रकरणी मुलुंड पोलीस ठाण्यात अदखलपात्र गुन्ह्याची नोंद झाली होती. तसेच इनोव्हा कारची कायदेशीर नोंदणी न करता त्या कारला बनावट नंबर प्लेट लावून फिरणाऱ्या कांबळेंसह दोघांवर काही दिवसांपूर्वी श्रीनगर पोलिसांनी गुन्हा दाखल झाला होता.
भाजप हा संस्कारी पक्ष असल्याचे सांगण्यात येते. मात्र, प्रत्यक्षात भाजप नगरसेवकाचे हे कृत्य भाजप कार्यकरिणीला आणि भाजप नेत्यांना अडचणीत आणणारे आहे. या संदर्भांत कांबळे यांच्याशी संवाद साधण्याचा प्रयत्न केला असता त्यांच्याशी संपर्क होऊ शकला नाही. मोठ्या पदावर काम केल्यानंतर अशी कृत्य पालिकेची प्रतिमा देखील मलीन करत आहेत.
