नवी मुंबई - भटक्या श्वानांना जेवायला घालाल तर खबरदार! दंड ठोठावला जाईल, असा अजब फतवा नवी मुंबईतील पाम बीच रोडवर असलेल्या एनआरआय कॉम्प्लेक्स या सोसायटीत काढला आहे. नियमांचे उल्लंघन करून भटक्या श्वानांना (Food for stray dogs) जेवायला घालणाऱ्या एका महिलेला चक्क ८ लाखांचा तर दुसऱ्या महिलेला ५० हजार रुपयांचा दंड ठोठावला आहे.
सोसायटीचा अजब फतवा -
नवी मुंबईत पामबीच रोडवर एनआरआय कॉम्प्लेक्स या सोसायटीचा परिसर ४५ एकर इतका आहे. या सोसायटीमध्ये ४० इमारती आहेत. या सोसायटीच्या आवारामध्ये जवळपास ३० ते ३५ भटके श्वान (कुत्री) फिरत आहेत. सोसायटी मधील भटक्या कुत्र्यांना अन्न खायला दिल्यास दंड ठोठावण्यात येईल, असा नियम सोसायटीच्या माध्यमातून काढला गेला. या प्रकरणी लाखो रुपयांचा दंड श्वानप्रेमींना लावण्यात आला आहे.
भटक्या श्वानांना अन्न देणाऱ्या महिलेला ८ लाखांचा दंड
भटक्या कुत्र्यांना खायला (Food for stray dogs) घातल्यामुळे या सोसायटीने श्वानप्रेमींना लाखोंचा दंड ठोठावला आहे. यासंदर्भात सोसायटीच्या सेक्रेटरी विनीता श्रीनंदन यांनी स्पष्टीकरण दिले. त्या म्हणाल्या या सोसायटीतील लहान मुले शिकवणीसाठी जातात तेव्हा ते भटक्या कुत्र्यांच्या मागे पळतात. अंगावर येतात, तसेच वृद्ध व्यक्ती कुत्र्यांच्या भीतीने कुठेही येऊ शकत नाहीत. त्यामुळे आम्ही या भटक्या कुत्र्यांसाठी एक वाडा बनवला आहे. तेथे त्यांना खायला दिले जाते मात्र तरीही काही सोसायटीतील नागरिक भटक्या कुत्र्यांना बाहेर खायला घालत आहेत. त्यामुळे आम्ही हा दंडाचा नियम लावला आहे. आम्ही जी कारवाई केली आहे ती सोसायटीच्या नियमानुसारच आहे, असे सोसायटीच्या सेक्रेटरी विनिता श्रीनंदन म्हणाल्या.
सोसायटीमधील रहिवाशांना लाखो रुपयांचा दंड -
भटक्या कुत्र्यांना खायला घातल्या प्रकरणी एनआरआय सोसायटी रहिवाशी अंशू सिंग यांना ८ लाख १२ हजार, मोना मोहन यांना ६ लाख आणि लिला वर्मा यांना ५५ हजाराचा दंड लागला आहे. एका वेळचे ५ हजार असा गेल्या मे महिन्यापासून अंशू सिंग यांचा दंड ८ लाखाच्या वर गेलाय. आतील भटक्या कुत्र्यांची सोय सोसायटीमध्येच करावी, अशी मागणी श्वानप्रेमींनी केली आहे. तसेच ॲनिमल व्हेलफिअर बोर्ड ॲाफ इंडिया या संस्थेने याबाबत सोसायटी पदाधिकारी यांना लेखी आदेश देवूनही ते पाळले जात नसल्याचा आरोप श्वानप्रेमींची केला आहे.
