सोलापूर - राज्यात सरकारने शेतकऱ्यांना संपूर्ण कर्जमाफी दिल्याची घोषणा केली. मात्र, प्रत्यक्षात अनेक शेतकरी कर्जमाफीपासून वंचित आहेत. कर्जमाफीची घोषणा करून सरकारने शेतकऱ्यांची फसवणूक केली आहे. तसेच शेतकऱ्यांच्या पीक विम्याचा प्रश्न राज्यात दिवसेंदिवस गंभीर बनत चालला आहे, या प्रश्नांकडे शासनाचेलक्ष वेधण्यासाठी आमदार बच्चू कडू यांच्या नेतृत्वाखाली राज्यभर प्रहारने 'जेलभरो आंदोलन' सुरु केले आहे. त्याचाच एक भाग म्हणून आज सोलापुरातही प्रहार पदाधिकऱ्यांनी आंदोलन केले.
राज्यातील शेतकऱ्यांना जर प्रत्यक्षात कर्जमाफी मिळाली असती, तर शेतकरी राजा सुखी बनला असता आणि शेतकऱ्यांचा विकास झाला असता. मात्र, सरकारचे 'खायचे दात एक आणि दाखवायचे एक' त्यामुळे शेतकरी आर्थिक विवंचनेत सापडले आहेत. त्यामुळे प्रहारने राज्यभरात जेलभरो आंदोलन सुरू केले आहे. तसेच वेळ पडलीच तर युती सरकारला सत्तेतून खाली खेचल्याशिवाय स्वस्थ बसणार नाही, असा इशारा आंदोलनकर्त्यांनी दिला आहे.
सरकार ज्या अधिकाऱ्यांची नेमणूक करते ते अधिकारीच शेतकऱ्यांची लुट करतात. त्यामुळे याचा फटका गरीब शेतकऱ्यांना बसत असल्याचा आरोप यावेळी आंदोलकांनी केला.
आंदोलनातील प्रमुख मागण्या
- शेतकऱ्यांना संपूर्ण कर्जमाफी द्यावी
- पिकविम्याची रक्कम तातडीने खात्यावर जमा करावी
- शेतकऱ्यांच्या उसाची एफआरपी रक्कम ज्या कारखान्यांनी दिलेली नाही, ती जमा करून कारखान्यांवर कारवाई व्हावी
- शेतीच्या पेरणी ते कापणी पर्यंतच्या कामांचा समावेश मनरेगा अंतर्गत करावा
- घोषित झालेल्या दुष्काळग्रस्त भागातील शेतकऱ्यांना दुष्काळी अनुदान द्यावे
- दुष्काळी भागातील विद्यार्थ्यांना शैक्षणिक शुल्क माफ करावे
