ठाणे- कोरोना विषाणूने सर्वत्र हाहाकार माजवला असून अमेरिकेसह अनेक देशात दररोज शेकडो लोकांचा बळी जात आहे. या संकटाची व्याप्ती ओळखून केंद्र आणि राज्य सरकारांनी संचारबंदीसह संपूर्ण लॉकडाऊन करण्यात आला. नागरिकांमधील संपर्क तोडून विषाणू संसर्गाची साखळी तोडण्यासाठी हे पाऊल उचलण्यात आले आहे. मात्र, ठाण्यातील गॅस सेवा पुरवणाऱ्या एका एजन्सीने कायद्याला हरताळ फासल्याचे दिसून आले आहे. शहर पूर्व भागातील कन्हैया नगर समोरील ओंकार गॅस एजन्सीने घरपोच गॅस वितरण सेवा बंद केल्याने नागरिकांना आपला जीव धोक्यात घालून सिलेंडर नेण्यासाठी एजन्सीत यावे लागत आहे.
गॅस एजन्सीमध्ये दररोज एकामागोमाग एक असे शेकडो नागरिक लांब रांगा लावून असल्याचे दिसतात. सरकारी आदेशानुसार दोन व्यक्तींमध्ये किमान ३ फुटांचे अंतर असणे गरजेचे आहे. मात्र, ओंकार गॅस एजन्सीत सगळे ग्राहक एकमेकांना खेटून असल्याचे दिसते. एजन्सीच्या या बेजबाबदार वर्तनामुळे संक्रमणाचा धोका प्रचंड वाढला असून अनेकांना कोरोना विषाणूची बाधा होण्याची शक्यता निर्माण झाली आहे.
या कृत्यावर, घरोघरी होणारे सिलेंडर वितरण थांबवून आम्ही आमच्या कर्मचाऱ्यांचे जीव वाचवत आहोत, असे उत्तर देत एजन्सीचे मालक सामान्य नागरिकांना वेठीस धरत आहेत. तसेच गॅस सिलेंडरचे पैसे सबसिडी वजा करून घेतले जाते व त्याबाबत पक्के बील ने देता चिठ्ठीवर लिहून दिले जाते. इतकेच नवे तर, दिलेल्या चिठ्ठीत पैसे घेतल्याची नोंद देखील नसते, असा सावळागोंधळ या ठिकाणी होत असताना देखील स्थानिक प्रशासन शांत का आहे, असा प्रश्न समोर येत आहे. दरम्यान, नागरिकांची दररोज होणारी गर्दी पाहता संक्रमणाचा धोका वाढला असून यावर लवकरात लवकर कारवाई व्हावी, अशी मागणी नागरिक करत आहेत.
हेही वाचा- दुधाच्या गाडीतून गावी जाणाऱ्या 15 जणांना कळंबोली पोलिसांनी घेतले ताब्यात
