ठाणे - मध्य रेल्वेने आज विशेष ब्लॉक जाहीर केला. त्यासाठी ठाकुर्ली येथील नवीन पादचारी पुलाच्या कामामुळे ठाणे ते डोंबिवली दरम्यान मध्य रेल्वेची वाहतूक 5 तास बंद ठेवण्यात येणार होती. मात्र, ब्लॉक असतानादेखील डोंबिवली रेल्वे स्थानकावर प्रवाशांची गर्दी दिसून आली. तसेच काही लोकल रद्द झाल्याने प्रवाशांचे हाल झाले.
रेल्वेने विशेष मेगा ब्लॉक जाहीर करून सुद्धा डोंबिवलीकरांनी रेल्वे स्थानकावर गर्दी केली. विशेष मेगा ब्लॉक हा ९.४५ ते १.४५ असा असताना सकाळी ८ वाजून ४२ मिनिटांची, तर ९.०६ मिनिटांच्या लोकल रद्द करण्यात आल्या. यामुळे डोंबिवली रेल्वे स्थानकाच्या फलाट क्रमांक २, ३ आणि ५ वर मोठी गर्दी झाली होती.
दरम्यान, ठाणे ते सीएसएमटी आणि डोंबिवली कर्जत-कसारा दरम्यान गाड्या धावणार आहेत. मेगा ब्लॉक जाहीर केल्यामुळे ठाणे स्थानकात नेहमीपेक्षा कमी गर्दी पाहायला मिळाली. तसेच मुंबईच्या दिशेने जाणाऱ्या रेल्वे प्रवाशांची संख्या आज दिसलीच नाही.
