ठाणे - कोरोनाच्या काळात तीन महिन्यांपूर्वी सर्वाधिक कोरोना बाधित रुग्ण कल्याण-डोंबिवली महापालिका हद्दीत आढळून आले होते. मात्र, दिवाळीनंतर कोरोनाबाधितांच्या संख्येसह मृत्यूदरही काही प्रमाणात खाली आला आहे. पण, कोरोना बाधित मृतदेहांवर अंत्यविधीची भीती कायम असल्याचे दिसून आले आहे. विशेष म्हणजे अंत्यविधीसाठी नातेवाईकांची परवड व त्रास पाहून महापालीकेने 27 जुलैला कल्याण पश्चिम परिसरातील बैलबाजार व लालचौकी, कल्याण पूर्वेतील विठ्ठलवाडी आणि डोंबिवली पूर्वेतील चोळे गाव, पाथर्ली, आणि शिवमंदिर या 6 स्मशानभूमीत ठेकदारांची नेमणूक करण्याचा निर्णय घेण्यात आला.
एका मृतदेहावर अंत्यविधीसाठी 3 हजार 700 रुपयांचा ठेका
महापालिका आयुक्तांनी कोरोना बाधित मृतदेहांवर अंत्यविधी करण्यासाठी 27 जुलैला पालिका हद्दीतील 6 स्मशानभूमीत ठेकरदारांची नेमणूक केली. तेव्हापासून त्या ठेकेदारांमार्फत कोरोना बाधित रुग्णांच्या मृतदेहाच्या अंत्यविधीसाठी 3 हजार 700 रुपयांप्रमाणे दर ठरविण्यात आले. मात्र, ठेकेदारांची नेमणूक करण्यापूर्वी गॅसवरील शव दाहिनीत सततचा बिघाडामुळे कोरोना बाधित मृतदेहांवर अंत्यविधीसाठी नातेवाईकांना प्रतिक्षा करत दोन ते तीन स्मशानभूमीत मृत्यदेह अंत्यविधीसाठी घेऊन जाण्याची वेळ आली होती.
एका मृतदेहावर अंत्यविधीसाठी लागतोय दीडतास
स्मशानातील गॅस दाहिनीत एका कोरोना बाधित मृतदेहावर संपूर्ण अंत्यविधीसाठी दीड तासांचा कालावधीत लागत असल्याची माहिती लालचौकी येथील वैकुंठ भूमीत कार्यरत असलेला कर्मचारी अमोल दाभाडे यांनी दिली. अमोल दाभाडे यांनी कोरोनाच्या सुरुवातीच्या काळापासून आतापर्यत 325 कोरोना बाधितांच्या मृतदेहांवर अंत्यविधी केला. मात्र, त्याला कधीही भीती वाटली नाही. कोरोनाची लागणही झाली नाही. पालिका प्रशासनाने ठरवून दिलेल्या अंत्यविधीचा खर्च पाहता लाकडासाठी 2 हजार 200 रुपये, डिझेल 500 रुपये आणि मृतदेहाची सुरुवातीपासून अंत्यविधी संपेपर्यत दोन कर्मचाऱ्यांसाठी 1 हजार (प्रत्येकी 500 रुपये), असे एकूण 3 हजार 700 रुपये ठेकेदारांना अदा करण्यात येत आहे. आतापर्यत 100 मृतदेहांवरील अंत्यविधी करणाऱ्या ठेकेदारांना बिले अदा करण्यात आली आहे.
मृतदेहावर अंत्यविधी केल्याने नातेवाईकांना कोरोनाची बाधा
कोरोना बाधित मृतदेहांवर अंत्यविधीचा कल्याण-डोंबिवली महापालिकेने ठेका देण्यापूर्वी 600 च्यावर कोरोना बाधित रुग्णांचा मृत्यू झाला होता. त्यातच कोरोना काळापासून नातेवाईकांना मृतदेहावर अंत्यविधी करण्यासाठी शासनाची नियमावली जारी केली आहे. तरीही नातेवाईक मृतदेहांवर नियमाला बाजूला सारून अंत्यविधी करत होते. सुरुवातीच्या काळात कोरोनाग्रस्त रुग्णांचा मृतदेह नातेवाईकांच्या ताब्यात देऊन त्यावर अंत्यविधी करण्यात येत होता. त्यावेळी उल्हासनगरमध्येही प्लास्टिकमधून गुंडाळून दिलेला मृतदेह बाहेर काढून त्याला अंघोळ घालण्यात सहभागी असलेल्या 17 नातेवाईकांना कोरोनाची लागण झाली होती. तर भिवंडीतही कोरोनाने मृत्यू झालेल्या व्यक्तीच्या अंत्ययात्रेत 65 जण सहभागी झाले होते. त्यामध्येही बहुतांशा नातेवाईकांना लागण झाल्याचे समोर आले होते.
1 हजार 89 जणांचा कोरोनाने मृत्यू; तर ५४ हजारांच्यावर कोरोनामुक्त
महापालिका हद्दीत कोरोनाच्या काळापासून ते आतापर्यंत 1 हजार 89 नागरिकांचा कोरोनाने मृत्यू झाला आहे. तर 54 हजारांच्यावर नागरिक कोरोनामुक्त होऊन बरे झाले आहेत. तर सध्याच्या स्थितीत 1 हजार 142 सक्रिय रुग्णांवर विविध रुग्णालयात उपचार सुरू आहेत.
हेही वाचा - कल्याणमध्ये देहविक्रीचा पर्दाफाश; ४ बांगलादेशी महिलांसह दलालाला अटक
हेही वाचा - कल्याणमध्ये बनावट डिझेल तयार करणाऱ्या गोदामावर पोलिसांची धाड; ६ अटकेत
