ठाणे : कळवा रुग्णालय आणि वाद हे आता एक समीकरणच बनून गेलंय. एक वाद संपत नाही तोच दुसरा नवा वाद सुरू होतो. या रुग्णालयात एकाच दिवशी तब्बल 18 जणांचा मृत्यू झाल्यानं रुग्णालयाची मोठी चर्चा सुरू झाली. मुख्यमंत्र्यांच्याच शहरात एका शासकीय रुग्णालयात घडलेल्या घटनेनं संपूर्ण राज्याचे लक्ष वेधलं. या घटनेची चौकशी करण्यासाठी समिती नेमण्यात आलीय. ही समिती चौकशीचं काम करतेय, अशाततच या रुग्णालयात नवा वाद सुरू झालाय. नौपाडा पोलिसांनी येथे ठेवलेल्या दोन मृतदेहांपैकी एक मृतदेह गायब झालाय. एका मृतदेहाची ओळख पटल्याने तो मृतदेह कुटुंबियांच्या ताब्यात देण्यात आला. परंतु दुसऱ्या मृतदेहाचा कोणताच पत्ता लागत नसल्यानं रुग्णालय प्रशासनाचं धाबं दणाणलं आहे.
मृतदेहाचा शोध सुरू : या प्रकरणाविषयी माहिती विचारली असता रुग्णालयाकडून माहिती देण्यात आली नाही. परंतु काही वेळानंतर एक मृतदेह गायब झाल्याचं सांगण्यात आलं. कळवा रुग्णालयाचे वैद्यकीय अधीक्षक डॉ. अनिरुद्ध माळगावकर यांनी या प्रकरणाची गंभीरतेने दखल घेतलीय. मृतदेहाचा शोध सुरू असल्याची माहिती त्यांनी दिली. नौपाडा पोलिसांनी शवागारातील सर्व मृतदेह तपासली नाहीत. एकदा तपासल्यावर त्यांना हरवलेला मृतदेह मिळेल, असा विश्वास त्यांनी व्यक्त केला. दोन्ही मृतदेह कळवा हॉस्पिटलमधील शवागारात ठेवण्यात आली होती. त्यातील एकाची ओळख पटल्याने मृतदेह रुग्णाच्या नातेवाईकांच्या ताब्यात देण्यात आला. परंतु दुसऱ्या मृतदेहाची ओळखू पटली नसल्याचं नौपाडा पोलीस ठाण्याचे वरिष्ठ पोलीस निरीक्षक संजय धुमाळ यांनी सांगितलं.
कर्मचाऱ्यांवर प्रचंड ताण : ठाण्यातील सिव्हिल रुग्णालयाच्या जागेवर सध्या नवी इमारत बांधण्याचं काम सुरूय. त्यामुळे हे रुग्णालय मनोरुग्णालयाच्या जागेत हलवलं आहे. मात्र याची माहिती ग्रामीण भागातील रहिवाशांना नसल्यामुळे केवळ ठाणे शहरच नव्हे तर पालघर, जव्हार, वाडा, मोखाडा, शहापूर, मुरबाड अशा विविध भागातून रुग्ण मोठ्या संख्येने रोज ठाणे महानगरपालिकेच्या कळवा हॉस्पिटलमध्ये येत आहेत. त्यामुळे येथील डॉक्टरांवर तसेच नर्स आणि कर्मचाऱ्यांवर प्रचंड ताण निर्माण झालाय.
हेही वाचा -
