ठाणे - कोरोना विषाणूने संपूर्ण जगभरात थैमान घातले आहे. राज्यातही या महामारीने पाय पसरायला सुरुवात केली आहे. राज्यातील कोरोनाबाधित रुग्णांची आणि मृतांची आकडेवारी झपाट्याने वाढत असल्याने सध्या चिंतेचे वातावरण आहे. देशभरात लॉकडाऊन लागू करण्यात आला आहे. मात्र, नागरिकांकडून या लॉकडाऊनचे गांभीर्याने पालन होताना दिसत नाही. त्यामुळे ठाण्यातील तरुणांना सतर्क होत खडा पहारा द्यायला सुरुवात केली आहे.
लॉकडाऊनमध्ये बिनधास्त फिरणाऱ्यांना चाप बसावा, यासाठी ठाण्यातील लक्ष्मी चिराग नगरमधील तरुण पुढे सरसावले आहेत. नगराच्या मुख्य 2 प्रवेशद्वाराजवळ एक चेक पोस्ट तयार करण्यात आले आहे. यामध्ये बाहेरील कोणत्याही व्यक्तीला नगरात प्रवेश दिला जात नाही. तर स्थानिक नागरिकांनादेखील विनाकारण बाहेर जाण्यास मज्जाव केला जातो.
100 जणांचा शिफ्टमध्ये असतो पहारा -
ठाणे महानगरपालिका क्षेत्रात कोरोनाचा प्रादुर्भाव दिवसा गणिक वाढत आहे. हा रोखण्यासाठी खबरदारीचा उपाय म्हणून इथून येणाऱ्या व जाणाऱ्यांची कसून तपासणी केली जाते. जर त्यांच्या बोलण्यात तथ्य दिसलं तरच त्यांना चेक पोस्टवरून पुढे सोडलं जाते. अन्यथा त्यांना परत पाठवलं जाते. यासाठी साधारण 100 जणांची चार शिफ्टमध्ये विभागणी करण्यात आली असून ही तुकडी दिवस रात्र खडा पहारा देत आहे.
एखादी व्यक्ती बाहेरील कुणाच्या संपर्कात आलीच नाही तर त्यांना कोरोना होण्याची शक्यता नाही, त्यामुळे कोणीही नगराच्या बाहेर जाऊ नये व कुणी बाहेरून येऊ नये, यासाठी येथे विशेष नाकाबंदीची व्यवस्था केली असल्याचे स्थानिकांनी सांगितले.
