नवी मुंबई - नवी मुंबईतील एका रुग्णालयात कोरोनामुळे ठेवण्यात आलेल्या चिमुकलीचा पहिला वाढदिवस साजरा करण्यात आला. रुग्णालय प्रशासनाने पुढाकार घेत हा वाढदिवस साजरा केल्याने या रुग्णालयातील डॉक्टरांचे कौतुक होत आहे.
या चिमुकलीच्या वडिलांना कोरोनाची लागण झाली होती. त्यानंतर चिमुकलीलाही कोरोनाने झाल्याचे निष्पन्न झाले. तर आईला देखील कोरोना संशयित म्हणून याच रुग्णालयात क्वारंटाइन करून ठेवण्यात आले होते. कोरोनामुळे संपूर्ण कुटुंबच रुग्णालयात असताना आपल्या मुलीचा पहिलाच वाढदिवस कसा साजरा करायचा, असा प्रश्न चिमुकलीच्या आई-वडिलांना पडला होता. चिमुकलीचा पहिला वाढदिवस असल्याची माहिती रुग्णालय प्रशासनाला समजली.
या चिमुकलीचा वाढदिवस रुग्णालयामध्येच साजरा करण्याचे रुग्णालय प्रशासनाने ठरवले. त्यानुसार डॉक्टर व चिमुकलीच्या आई-वडिलांनी पीपीई कीट परिधान करत केक कापून रुग्णालयातच चिमुकलीचा पहिला वाढदिवस साजरा केला. यावेळी या सर्वांच्याच चेहऱ्यावरील आनंद पाहण्याजोगा होता.
