ठाणे - कोरोना पॉझिटिव्ह रुग्णांवर केलेल्या उपचारांचा उर्वरित कचरा रूग्णालयांतून थेट रस्त्यावर आणून टाकला जात असल्याचे अनेकदा आढळून आले आहे. डोंबिवलीमध्येही असाच प्रकार समोर आला आहे. सार्वजनिक ठिकाणी कोरोना रुग्णांसाठी वापरलेल्या वस्तू आणि कचरा आणून टाकण्याच्या या प्रकारामुळे कोरोना संसर्ग वाढण्याची भीती तज्ञांनी व्यक्त केली आहे.
काही दिवसांपूर्वी डोंबिवलीच्या निवासी भागातील मिलापनगर तलावासमोर कुणीतरी बायोमेडिकल वेस्टच्या प्लास्टिक पिशव्या आणून टाकल्या होत्या. त्या पिशव्यांमध्ये हातमोजे, मास्क, प्लास्टिक, रबर सदृश्य वस्तू दिसून आल्याने जवळपास राहणाऱ्या रहिवाश्यांमध्ये भीतीचे वातावरण पसरले आहे. त्यानंतर डोंबिवली एमआयडीसीच्या फेज-2 मध्ये डोंबिवली नागरी सहकारी बँक ते दुर्वांकुर हॉल दरम्यान सर्व्हिस रोडच्याकडेला कोविड-19 च्या रुग्णांसाठी हॉस्पिटलमध्ये वापरले जाणारे पीपीई किट आणि इतर वापरलेले साहित्य (मेडिकल वेस्टेज) मोठ्या प्रमाणात गोण्यांमध्ये भरून आणून टाकण्यात आले आहे. हा निष्काळजीपणा करणाऱ्यांवर कठोर कारवाई झाली पाहिजे, अशी मागणी संतप्त स्थानिकांनी केली आहे.
डोंबिवली नागरी सहकारी बँकेसमोरच्या कल्याण-शिळ मार्गाला जोडणारा रस्ता बंद असल्यामुळे सर्व्हिस रोडवरूनच मोठ्या प्रमाणात वाहने ये-जा करतात. तसेच या जागेच्या आजूबाजूला लहान-मोठ्या कंपन्या व महावितरणचे कार्यालयही आहे. त्यांच्या कर्मचाऱ्यांचा, सोनारपाडा, म्हात्रेपाडा या निवासी विभागातील नागरिकांचाही या भागात वावर असतो. त्यामुळे कल्याण-डोंबिवली महानगपालिका आयुक्त, आरोग्य विभाग, पोलिस प्रशासाने या गंभीर समस्यकडे लक्ष द्यावे. संबंधित दोषींवर कठोर कारवाई करावी, अशी मागणी पर्यावरण प्रेमी गिरीमित्र प्रतिष्ठानचे मंगेश कोयंडे यांनी केली आहे.
कोविड रुग्णांसाठी वापरलेल्या वस्तूंची विल्हेवाटी अशा पद्धतीने होऊ लागल्याने आसपास राहणाऱ्या रहिवाश्यांचे आरोग्य धोक्यात आले आहे. महानगरपालिका आयुक्तांसह संबंधित अधिकाऱ्यांनी आणि पोलिसांनीही या प्रकाराची गंभीर दखल घ्यावी, अशी मागणी डोंबिवलीकरांकडून पुढे आली आहे.
