पंढरपूर - अवघ्या महाराष्ट्राचे आराध्य दैवत असलेल्या पंढरीच्या सावळ्या विठुरायाच्या मुर्तीच्या संवर्धनासाठी वज्रलेपनाची प्रक्रिया पुर्ण झाली आहे. सिलिकॉन रेझिंग आणि विशिष्ट द्रव्य पदार्थाचे लेपन विठ्ठलाच्या मूर्तीला लावण्यात आले. औरंगाबाद येथील पुरातत्त्व विभागाचे अधिकारी श्रीकांत मिश्रा यांच्या मार्गदर्शनाखाली ही प्रक्रिया पूर्ण झाली. वज्रलेपनानंतर सावळ्या विठोबाच्या सौंदर्यात आणखी भर पडणार आहे.
श्री विठ्ठल रूक्मिणी मंदिरे समितीने शासनाच्या न्याय व विधी खात्याकडे विठ्ठल आणि रूक्मिणी मूर्ती संवर्धनासाठी वज्रलेप करण्याची परवानगी मागितली होती. यानंतर वज्रलेपनासाठी मान्यता देण्यात आली. ही प्रक्रिया मंगळवारपासून सुर करण्यात आली होती. ती बुधवारी पूर्ण झाली. या वज्रलेपनामध्ये मुर्तीला सिलिकॉन रेझिंग आणि विशिष्ट द्रव्य पदार्थाचे लेपन लावण्यात आले. या लेपनामुळे मूर्तीचे संवर्धन होण्यास मदत होणार आहे.
सध्या कोरोना विषाणूच्या प्रादुर्भावामुळे भाविकांना दर्शनासाठी मंदिर बंद आहे. यामुळे या काळातच पुरातत्व विभागाकडून हे वज्रलेपन करून घेण्याचे नियोजन करण्यात आले. त्याप्रमाणे वज्रलेपन करण्यात आले.
यापूर्वी कधी करण्यात आले होता वज्रलेपन?
यापूर्वीही विठ्ठलाच्या मूर्तीवर १९९८, २००५ आणि २०१२ मध्ये वज्रलेपन करण्यात आले होते. २०१२ मध्ये आठ वर्षापूर्वी शेवटचा वज्रलेपन करण्यात आले होते. यानंतर दर पाच वर्षांनी मूर्तीना हा लेप द्यावा, अशी सूचना पुरातत्व विभागाने दिली होती. मागील काही महिन्यांपूर्वी औरंगाबाद येथील पुरातत्व विभागाच्या अधिक्षकांनी (रसायनतज्ज्ञ) मूर्तीची पाहणी केली होती आणि वज्रलेपन करण्याची शिफारस केली होती. यानंतर मंदिर समितीने शासनाच्या न्याय व विधी खात्याकडे यासाठी परवानगी मागितली होती.
