सोलापूर- जगभरात कोरोना व्हायरसने थैमान घातले आहे. राज्यातही कोरोनाचा विषाणू झपाट्याने पसरत आहे. त्यामुळे कोरोनाचा विळखा असाच वाढत राहीला तर रुग्णालयाची कमतरता भासू शकते. त्यामुळे संकट ओळखून सोलापूर शहरातील नई जिंदगी भागातील मदरसाची जागा आयसोलेशन वार्डसाठी देण्याची तयारी मदरसाचे मौलाना हारिस दस्तगीर शेख यांनी दाखविली आहे. मदरसाचे रुपांतर कोरोना रुग्णांसाठी आयसोलेश वार्डात करावे, अशी मागणी त्यांनी मुख्यमंत्री उद्धव ठाकरे तसेच जिल्हाधिकारी यांच्याकडे पत्राद्वारे केली आहे.
हेही वाचा- मुंबईतील पोलीस उपायुक्ताला कोरोनाची लक्षणे; रुग्णालयात केले दाखल पण...
सोलापूर शहरातील नई जिंदगी हा भाग मुस्लीम बहूल आहे. या भागातील चंद्रकला नगर येथील अल फुरकान मदरसाची जागा दोन महिन्यांकरिता आयसोलेशन वार्डसाठी देण्याची घोषणा अल फुरकान एज्युकेशनल आणि वेल्फेअर ट्रस्टचे अध्यक्ष मौलाना हारिस दस्तगीर यांनी केली आहे.
सध्या सोलापुरात कोरोनाचा एकही रुग्ण नाही परंतु, पुढे भविष्यात गरज भासल्यास आपल्या मदरसाची जागा आयसोलेशन वार्डसाठी उपलब्ध करुन देण्याची घोषणा मौलाना हारीस यांनी केली. कोरोना वायरस रोखण्याच्या प्रयत्नात आम्ही देशा सोबत आहोत. आमच्या संस्थेद्वारे एक अरबी मदरसा चालवला जातो. चंद्रकला नगर येथील हा मदरसा सध्या लॉकडाऊनमुळे बंद आहे. तरी या मदरसाची जागा आम्ही मदरसा सुरू होईपर्यंत आयसोलेशन वार्डसाठी उपलब्ध करुन देणार आहोत.
मुहम्मद पैगंबरांच्या शिकवणीनुसार हे फार मोठे व पुण्याचे काम आहे. मदरसा सुरू होईपर्यंत ही जागा रुग्णांच्या उपचारासाठी देण्याचा निर्णय ट्रस्टने घेतला आहे. तरी आपल्यास गरज भासल्यास आम्हाला सेवा करण्याची संधी द्यावी, अशा मागणीचे पत्र मौलाना हारीस यांनी महाराष्ट्रचे मुख्यमंत्री उद्धव ठाकरे, सोलापूर महानगरपालिकाचे आयुक्त, सोलापूर पोलीस आयुक्त आणि जिल्हाधिकारी सोलापूर यांना दिले आहे.
