विशेष : सोलापूर जिल्ह्यातील अशी ग्रामपंचायत जिथे 67 वर्षांपासून निवडणूकच नाही

राज्यात सुमारे १४ हजार ग्रामपंचायत निवडणुकीची रणधुमाळी सुरू आहे. मात्र सोलापूर जिल्ह्यातील एक गाव असे आहे, जिथे मागील ६७ वर्षापासून निवडणूकच झाली नाही. ग्रामपंचायत बिनविरोध करण्याची परंपरा गावाने अबाधित ठेवली आहे. पाहुया ईटीव्ही भारतचा विशेष रिपोर्ट..

पंढरपूर (सोलापूर) - नववर्षाच्या सुरुवातीलाच राज्यामध्ये ग्रामपंचायत निवडणुकीचे पडघम वाजत असताना दिसत आहेत. त्यामुळे गावागावात सध्या गरमागरम चर्चा सुरू आहेत. मात्र निवडणुकांच्या या सगळ्या रणधुमाळीत सोलापुरातलं एक गाव असं आहे, जिथे ग्रामपंचायत स्थापन झाल्यापासून निवडणूकच लागली नाही. सोलापूर जिल्ह्यातील माढा तालुक्यातील निमगाव टे या गावाने मागील 67 वर्षापासून बिनविरोध निवडून येण्याची परंपरा कायम राखली आहे.

गावात उमेदवारी अर्ज दाखल करण्याच्या दिवशी निघते विजयी मिरवणूक -

माढा तालुक्यातील निमगाव टे या गावात गेल्या 67 वर्षापासून ग्रामपंचायतीची एकदाही निवडणूक झाली नाही. विशेष म्हणजे गावातील सर्व जाती धर्मांना एकत्रित घेऊन बिनविरोध निवडणुकीची प्रक्रिया पार पडते. ग्रामपंचायत निवडणुकीचे उमेदवार गावातले जेष्ठ मंडळी ठरवतात. या प्रत्येक प्रभागातील एक उमेदवार सर्वानुमते ठरवला जातो. तोच उमेदवार निवडणुकीसाठी अर्ज भरतो. विरोधात कुठलाही उमेदवारी अर्ज नसल्याने निवडणूक बिनविरोध होते. उमेदवारी अर्ज दाखल करण्याचा दिवसच विजयाच्या मिरवणुकीने समाप्त होतो.

निमगाव टे ग्रामपंचायत कारभारात शिंदे घराण्याचे वर्चस्व -

निमगाव टे ग्रामपंचायत दिवंगत विठ्ठलराव शिंदे यांच्या मार्गदर्शनाखाली स्थापन झाली. या ग्रामपंचायतीमध्ये माढ्याचे आमदार बबन शिंदे व करमाळ्याचे आमदार संजय शिंदे यांच्या देखरेखीखाली कारभार चालतो. निमगाव या गावची लोकसंख्या सुमारे तीन हजार आहे. या गावात एकूण अकरा प्रभाग आहेत. या गावात जातीनुसार आरक्षणही देण्यात आले आहे. गावातील प्रत्येक सदस्य आरक्षणानुसार दिला जातो. यामुळे गावात एकोप्याचे दर्शन होताना दिसते. या गावगाड्याच्या कारभारामध्ये शिंदे घराण्याची तिसरी पिढी जोमाने काम करत आहे.

पोलीस ठाण्यात एकही तक्रार नाही -

निमगाव टे गावात निवडणुका होत नसल्याने पोलीस ठाण्यात एकही तक्रार आजपर्यंत दाखल झाली नाही. गावातली भांडण मिटवण्याची पद्धतही खूप सोपी आहे. जी सगळ्यांना बंधनकारक असते. एखाद्या न्यायव्यवस्थेसारखं गावातल्या तंटामुक्ती समितीचं कामकाजाचं स्वरूप आहे. गावातील ज्येष्ठ मंडळी समंजसपणाच्या भूमिकेतून गावातील वाद व तंटे मिटवतात.

जिल्ह्यात विकासाचे मॉडेल म्हणून गावाची ओळख -

निमगाव गावातील विकासाबाबत पाणी, रस्ते, आरोग्य सुविधाबाबत गाव विकासाचे मॉडेल आहे. गावातील प्रत्येक युवकाला नोकरीची संधी उपलब्ध करून दिली आहे. गावातील शाळेला एक आदर्श शाळा म्हणून पुरस्कार प्राप्त आहे. गावांमध्ये विविध जाती व धर्माचे लोक गुण्यागोविंदाने राहतात. निमगाव टे या ग्रामपंचायतीला राज्य शासनाचे अनेक पुरस्कारही प्राप्त झाले आहेत. अनेक गावांमध्ये निवडणूक बिनविरोध व्हावी, म्हणून प्रयत्न केले जातात. मात्र गावातला संघर्ष आणि वाद निर्माण होतात. रक्ताच्या नात्यांनी एकमेकांच्या विरोधात निवडणुका लढवलेली उदाहरणं गावोगावी पाहायला मिळतात. निमगाव मात्र त्याला अपवाद आहे. गेल्या 67 वर्षांपासून या गावात बिनविरोध निवडणुकीची परंपरा आहे. त्यामुळे गाव सुखी आणि शांत आहे.