Sitaram Yechury Criticizes BJP : देशात लोकशाही...तर भाजपला सत्तेपासून दूर ठेवणे गरजेचे - सिताराम येचुरी

देशातील केंद्रीय संस्थांचा भाजप दुरुपयोग करत असून 'ईडी' व 'सीबीआय' मार्फत चौकशी लावली जात आहे. देशात आजपर्यंत 'ईडी' मार्फत 5700 केसेस दाखल केल्या. शिक्षा फक्त 23 जणांना झालेली आहे. देशात लोकशाही टिकवायची असेल तर भाजपला सत्तेपासून दूर ठेवणे गरजेचे आहे, असे वक्तव्य माजी खासदार सिताराम येचुरी यांनी आज सोलापुरात केले आहे.

सोलापूर: सिताराम येचुरी हे गुरुवारी सोलापूर दौऱ्यावर आले होते. शासकीय विश्रामगृह येथे त्यांनी पत्रकार परिषद घेऊन माध्यमांशी संवाद साधला. यावेळी त्यांनी संसदीय कामकाजावर नाराजी व्यक्त केली. 2022 मध्ये संसदेचे फक्त 56 दिवस कामकाज चालले. त्यातील 52 दिवस काहीही काम केले नाही. भारताचे संविधान आणि लोकशाही वाचविण्यासाठी मोदी सरकारला हटविणे गरजेचे आहे, तरच देश वाचणार आहे आणि यासाठी देशभरातील सर्वांनी एकत्र येणे गरजेचे आहे, असे प्रतिपादन माकपचे महासचिव व माजी खासदार सिताराम येचुरी यांनी केले.

तो तर राज्याभिषेक सोहळात: ५० लाख कोटींच्या खर्चाचे अधिकार केंद्र सरकार स्वतःच्या हातात घेऊन कायदा पास करत आहे. ही देशासाठी अत्यंत निंदाजनक बाब आहे. संसदेचे काम मजबूत केले पाहिजे. संसदेच्या नवीन इमारतीचे उद्घाटन म्हणजे एक राज्याभिषेक सोहळाच होता. कोणालाही विश्वासात न घेता संसदेची नवीन इमारत बांधण्यात आली. मोदी सरकारने यासाठी स्वतःच निर्णय घेतलेले आहेत. एका राजा प्रमाणे संसद इमारतीचे उद्घा‌टन करण्यात आले. राजा महाराजांची ही प्रथा बंद करून जनतेचे सरकार किंवा संविधानिक सरकार स्थापन करण्यात यावे, असे येचुरी म्हणाले.

नाम बदलने से इतिहास नहीं बदलता: देशात व महाराष्ट्रात शहरांची नावे बदलली जात आहे. यावर सिताराम येचुरी यांनी 'नाम बदलने से इतिहास नहीं बदलता' असे मत व्यक्त केले आहे. देशभरामध्ये जातीय तेढ निर्माण करण्याचे कारस्थान रचले जात आहे. धार्मिक आणि सांप्रदायिक धृविकरणाच्या दिशेने देश नेण्याचा कुटील डाव भाजपाकडून सुरू असल्याचा आरोप येचुरी यांनी केला.

हेही वाचा: