सोलापूर- ऊस उत्पादक शेतकऱ्यांची एफआरपीची रक्कम न देणारे भाजप नेते कल्याण काळे यांच्यावर फौजदारी गुन्हा दाखल करण्याचा सल्ला राज्याचे उपमुख्यमंत्री अजित पवार यांनी शेतकऱ्याला दिल्याचे समोर आले आहे. पंढरपूर तालुक्यातील सुस्ते येथील विशाल चव्हाण या शेतकऱ्याने उपमुख्यमंत्री अजित पवारांना फोन केला होता. या संभाषणाची 'ऑडिओ क्लिप' आता व्हायरल झाली आहे.
संवादामध्ये उपमुख्यमंत्री अजित पवारांनी थेट काळे यांच्या विरोधात गुन्हा दाखल करण्याचा सल्ला दिल्याने सोलापूर जिल्ह्यातील साखर कारखानदारांमध्ये एकच खळबळ उडाली आहे. भाजप नेते कल्याण काळे यांचे पंढरपूर तालुक्यात सहकार शिरोमणी वसंतराव काळे सहकारी साखर कारखाना आणि सीताराम महाराज खर्डी येथे खासगी, असे दोन साखर कारखाने आहेत. कारखान्या तर्फे २०१७-१८ आणि २०१८-१९ या दोन वर्षाची एफआरपीची रक्कम शेतकऱ्यांना देणे बाकी आहे. तर, २०१९-२० या गाळप हंगामात दोन्ही कारखाने बंद होते. दोन वर्षे एफआरपीची रक्कम थकीत आहे, तर चालू हंगामात कारखाने सुरू होण्याची कोणतीही चिन्हे नाहीत. त्यामुळे, आता शेतकऱ्यांच्या सहनशीलतेचा अंत झाला आहे.
याबाबत पंढरपूर तालुक्यातील विशाल चव्हाण या शेतकऱ्याने थेट उपमुख्यमंत्री अजित पवारांकडे तक्रार केली होती. यावर अजित पवारांनी थेट कल्याण काळे यांच्याविरुद्ध फौजदारी गुन्हा दाखल करण्याचा सल्ला दिला होता. यावर चव्हाण यांनी शेतकऱ्यांची कोणी दखल घेत नाही, अशी खंत व्यक्त केली होती. त्यावर, पोलिसांना माझे नाव सांगा, असा सल्ला अजित पवारांनी दिला होता.
दरम्यान, राष्ट्रवादी काँग्रेसचे सर्वेसर्वा खासदार शरद पवार हे आमदार भारत भालके यांच्या घरी आले असता कल्याण काळे यांना भेट दिली नव्हती. सध्या सोलापूर जिल्ह्यातील साखर कारखान्यांच्या ऊस गाळप हंगामाची तयारी सुरू आहे. अनेक कारखान्यांचे बॉयलर अग्निप्रदीपन कार्यक्रम संपन्न झाले आहेत. अशातच थकीत एफआरपीच्या मागणीसाठी शेतकरी आक्रमक झाल्याने वाद आणखी पेटण्याची चिन्हे दिसू लागली आहेत.
हेही वाचा- ताटकळेल्या सोलापूरकरांसाठी खुशखबर, 9 ऑक्टोबरपासून सुरू होणार सोलापूर-मुंबई सुपरफास्ट एक्स्प्रेस
