पंढरपूर - सावळ्या विठुरायाच्या दर्शनाची आस मनी घेऊन शेकडो किमीचे अंतर पार करून विठ्ठलभक्त पंढरीत येतो. पांडुरंगाचे दर्शन करण्यापूर्वी चंद्रभागा नदीत पवित्र स्नान करतो, मात्र सध्या चंद्रभागा नदीपात्र यावर्षी वारकऱ्यांविना कोरडे पडले आहे.
पांडुरंग हे संकट नक्की दूर करेल, या विश्वासाने प्रशासनास सहकार्य म्हणून भाविकांनी पंढरीची वाट यावेळी वर्ज्य करत आपल्या घरी राहूनच एकादशी सोहळा भक्तीच्या माध्यमातून पार पाडण्याचा निर्णय घेतला आहे. पंढरपुरात आजपासून संचारबंदी लागू करण्यात आली आहे. यामध्ये विठ्ठल मंदिर परिसर आणि चंद्रभागेचे वाळवंट असे निर्मनुष्य झाले आहे. ज्या चंद्रभागेत लाखो वैष्णवाची गर्दी असते ती चंद्रभागा सुनीसुनी झाली आहे. तिथे फक्त पोलीस त्या चंद्रभागेत दिसून येत आहे. नदी पात्रातील 10 घाटावर वारकऱ्यांची गर्दी होत होती. ते घाट ओसाड पडल्याचे चित्र आषाढीच्या वारीला दिसत आहे.
आषाढी सोहळ्यासाठी गर्दीने फुलणारे पंढरीचे रस्ते सुनसान आहेत तर जिथे कीर्तनाचा, हरीनामाचा गजर होतो त्या चंद्रभागेचे वाळवंट ओसाड पडले आहे.
उद्या मुख्यमंत्री ठाकरे यांच्या हस्ते विठ्ठलाची महापूजा होणार आहे. त्यासाठी मुख्यमंत्री मुंबईतून पंढरपूरकडे रवाना झाले आहेत. आज आषाढी एकादशीचा सोहळ्यासाठी मानाच्या दिंडीसह प्रत्येकी 20 वारकऱ्यांसह पंढरीत दाखल झाल्या आहेत. मात्र, एकदशी दिवशी नगरप्रदक्षिणा करणार आहेत. मात्र, प्रदक्षिणा मार्ग, नवी पेठे, जूनी पेठे परिसर हा कोरोना रुग्ण सापडल्याने प्रतिबंधित क्षेत्र करण्यात आले आहे. आता कोरोनाचा वाढता प्रादुर्भाव उद्या होणाऱ्या एकदशीला नगर प्रदक्षिणा होणार का ? याबाबत प्रश्नचिह्म निर्माण झाले आहे.
