सोलापूर - सोलापूर महानगरपालिका अंतर्गत येणाऱ्या शहर वासीयांना 1 सप्टेंबरपासून दर महिन्याला 50 रुपये याप्रमाणे वार्षिक उपकर द्यावाच लागेल, असे राज्य शासनाचे आदेश असल्याची माहिती सोलापूर महापालिका आयुक्त पी शिवशंकर यांनी माध्यमांना दिली.
सोलापूर महानगरपालिकेच्या वतीने यापूर्वी शहरवासीयांना ओला कचरा व सुका कचरा यासाठी डस्टबिनचे वाटप करण्यात आले होते. तसेच कचरा व्यवस्थापन करण्यासाठी नागरिकांच्या घरोघरी घंटा गाड्या देखील जात आहेत. याच्या व्यवस्थपनासाठी हे उपकर लावला जात असल्याची माहिती आयुक्त पी. शिवशंकर यांनी दिली.
या उपकर विरोधात माकप व सिटूच्या वतीने आंदोलन करण्यात आले होते. टाळेबंदीमुळे नागरिकांचे मोठ्या प्रमाणात हाल झाले आहेत. शासनाने हे उपकर लादून शहर वासीयांची लूट करू नये व तसेच कचरा व्यवस्थापनासाठी महापालिका प्रशासन कर घेत आहे. तरी देखील 1 सप्टेंबर, 2020 पासून अतिरिक्त 50 रुपये कर भरावा या आदेशाला अनेक सामाजिक संघटना विरोध करत आहेत.
महापालिका आयुक्तांंनी दिलेल्या माहितीनुसार हा आदेश फक्त सोलापूर महानगरपालिकेने काढले नसून राज्य शासनाने आदेश काढला आहे. राज्यातील सर्व महानगरपालिकांसठी हा उपकर लागू होणार आहे. नागरीकांनी सहकार्य करत राज्य शासनाच्या या आदेशाचा पालन करावे, असे आवाहन महानगरपालिका आयुक्तांनी केले आहे.
हेही वाचा - गॅसचा काळा बाजार करणाऱ्यावर गुन्हे शाखेची कारवाई; 1 लाख 64 हजारांचा मुद्देमाल जप्त
