सोलापूर - अकलूज पोलिसांच्या सतर्कतेमुळे व अथक प्रयत्नांमुळे भीषण आगीत सापडलेल्या डॉ. नरळे कुटुंबातील ५ जणांचे प्राण वाचले आहेत. अकलूज पोलिसांच्या या कामगिरीबद्दल सर्वच स्तरातून कौतुक होत आहे.
अशी घडली थरारक घटना -
शहरातील जाधव कॉमक्समध्ये डॉ.शिवाजी नरळे हे चौथ्या मजल्यावरील फ्लॅटमध्ये कुटुंबियांसह राहतात. पण, बुधवारी संध्याकाळी डॉ. नरळे हे ११ वाजेपर्यंत हॉलमध्ये काम करत होते. त्यावेळी त्याची पत्नी आणि ३ मुले बेडरुममध्ये झोपली होती. रात्री साडेबाराच्या सुमारास हॉलमध्ये विचित्र आवाज ऐकू येत असल्याचे लक्षात आल्यावर डॉ. नरळे यांनी हॉलमधील बेडरुमचा दरवाजा उघडताच धुराचा लोट आला. आपल्या घराला आग लागल्याचे डॉ.नरळे यांच्या लक्षात आल्यानंतर त्यांनी शेजाऱ्यांना मोबाईलवरुन सांगितले. शेजारी राहण्याऱ्यांनी अकलूज पोलीस स्टेशनला घटनेची माहीती दिली.
आग लागलेल्या घटनेची माहिती मिळताच अकलुज पोलिसांचे पथक घटनास्थळी दाखल झाले. हॉलमधुन आग लागल्याने पोलिसांना आतमध्ये जाणे शक्य होत नव्हते. अशावेळी प्रसंगावधान राखून पोलिसांनी शेजारच्या इमारतीवरुन शिडीच्या सहाय्याने चौथ्या मजल्यावर पोहचून खिडकीच्या काचा फोडून अग्निशामक दलाच्या सहाय्याने पाणी मारुन आग आटोक्यात आणली. डॉ.नरळे त्यांची पत्नी सुप्रिया, मुलगी पुजा, श्रीजा आणि मुलगा तनिष्क यांना सुखरुप बाहेर काढले. चौथ्या मजल्यावर हॉलमध्ये आग लागल्याने व सर्व कुटुंब बेडरुममध्ये असल्यामुळे त्यांना बाहेर कसे काढायचे, असा प्रश्न पोलिसांसमोर होता. पोलिसांनी खिडक्या, दरवाजे तोडून आग विझवली व ५ जणांचे प्राण वाचवण्यात यश मिळवले.
अकलुज ग्रामपंचायत, सहकार महर्षि कारखाना, माळीनगर कारखाना, श्रीपुर कारखाना, पंढरपूर येथिल अग्निशामक दल मागवण्यात आले होते. अकलुज पोलीस ठाण्याचे पोलीस निरीक्षक भगवान निंबाळकर सहाय्यक पोलीस निरीक्षक सागर काटे, पोलीस हेडकाँस्टेबल संतोष घोगरे, सुधीर शिंदे, दिलीप लव्हटे, अविनाश मोरे, पोलीस नाईक अनिल शिंदे, महेश पाटील, अमित खराडे, संतोष बोद्रे, होमगार्ड सोमेश्वर पवार, संजय सुरवसे, रोहीत भोसले, सागर देखणे, महेश वजाळे आणि पोलीस मित्र विशाल साठे या पथकाने ही कामगिरी पार पाडली. पोलिसांच्या या विशेष कामगिरीबद्दल कोल्हापूर परीक्षेत्राचे पोलीस महानिरीक्षक डॉ.सुहास वारके सोलापूर जिल्ह्याचे पोलीस अधिक्षक मनोज पाटील यांनी अभिनंदन केले. तसेच अकलुज उपविभागिय अधिकारी मंगेश चव्हाण यांनी सर्व टिमचा सत्कार केला. तर, या कामगिरी बद्दल पोलीस अधिक्षक मनोज पाटील यांनी अकलुज पोलीस ठाण्याच्या या टिमला ३४ हजार रुपये बक्षिस जाहीर केले. लवकरच सर्व टिमला प्रशस्तीपत्र व बक्षिस देवुन गौरवण्यात येणार असल्याचे यावेळी त्यांनी सांगितले.
