सोलापूर - माजी आमदार दिलीप माने यांच्या कारची दुचाकीला धडक बसून झालेल्या भीषण अपघातात दुचाकीस्वाराचा जागीच मृत्यू झाल्याची घटना घडली आहे. मंगळवारी सकाळच्या सुमारास माळशिरस तालुक्यातील तांदुळवाडी येथे हा अपघात झाला. शहाजी राऊत, असे या अपघातात मृत झालेल्या व्यक्तीचे नाव आहे. तर अपघातात माने आणि त्यांचा चालक किरकोळ जखमी झाला आहे.
हेही वाचा - 'तान्हाजी' चित्रपट करमुक्त करा, संभाजी ब्रिगेडची मागणी
माजी आमदार माने हे आपल्या कारने म्हसवडकडे देवदर्शनासाठी निघाले होते. यावेळी तांदुळवाडीनजीक साळमुख रोडवरील स्वामी समर्थ मंगल कार्यालयाशेजारी त्यांच्या कारची समोरून येणार्‍या दुचाकीस जोरदार धडक बसली. यात दुचाकीस्वार शहाजी राऊत यांचा जागीच मृत्यू झाला. या अपघातात मृत राऊत यांच्या दुचाकीचा चक्काचूर झाला. तर माने यांच्या कारचे मोठे नुकसान झाले. या अपघाताची माहिती मिळताच पोलीस घटनास्थळी दाखल झाले. दरम्यान, माने हे पंढरपूर येथील रुग्णालयात उपचार घेऊन सोलापूरला रवाना झाले.
