सोलापूर - मंगळवारी (दि. 25 मे) शहर आणि जिल्ह्यात 965 नव्या कोरोनाग्रस्तांची वाढ झाली आहे. दिलासादायक बाब म्हणजे मंगळवारी 3 हजार 288 रुग्ण कोरोनातून बरे होऊन घरी परतले आहेत. तर ग्रामीणमधील 22 व शहरातील 6 रुग्णांचा, असे एकूण 28 रुग्णांचा कोरोनामुळे मृत्यू झाला आहे.
कोरोनाची दुसरी लाट ग्रामीण भागासाठी चिंताजनक बनली आहे. मागील 40 दिवसांत सोलापूर शहर आणि जिल्ह्यात जवळपास 60 हजार रुग्ण वाढले आहेत. आजतागायत जिल्ह्यातील ग्रामीण भागात 1 लाख 18 हजार 913 व्यक्‍ती कोरोना विषाणूची लागण झाली आहे. शहरात देखील आजतागायत 27 हजार 964 व्यक्‍ती कोरोनाबाधित आढळले आहेत. शहर आणि जिल्ह्यात एकूण रुग्णसंख्या सद्यस्थितीत 1 लाख 46 हजार 877 झाली असून त्यापैकी एक लाख 31 हजार 644 रुग्णांनी कोरोनावर मात केली आहे.
सोलापुरात चाचण्या झाल्या कमी
शहर व ग्रामीण भागातील कोरोना चाचण्यांचे प्रमाण कमी करण्यात आले आहेत. सोलापूर ग्रामीणमध्ये दररोज दहा हजारांवर तर शहरात तीन हजारांपर्यंत कोरोना चाचण्या होत होत्या. मात्र, दोन दिवसांपासून त्यात घट झाली असून त्यामागे नेमके कारण काय, असा प्रश्‍न निर्माण होत आहे.
सोलापूर ग्रामीण अहवाल
सोलापूर जिल्ह्यातील ग्रामीण भागात जिल्हा आरोग्य प्रशासनाने 8 हजार 906 जणांची तपासणी केली. यामध्ये 924 जणांचा कोरोना अहवाल पॉझिटिव्ह आला आहे. ग्रामीण भागात 3 हजार 188 जण कोरोनामुक्त झाले आहे. ग्रामीण भागातील 22 पॉझिटिव्ह रुग्णांचा कोरोनामुळे मृत्यू झाला आहे. तर सद्यस्थितीत जिल्ह्यातील ग्रामीण भागात 10 हजार 766 सक्रिय रुग्ण असून त्यांवर उपचार सुरू आहे.
सोलापूर शहर अहवाल
सोलापूर शहरातील आरोग्य प्रशासनाने 2 हजार 12 जणांची तपासणी केली. त्यामध्ये 41 जणांचा कोरोना अहवाल पॉझिटिव्ह आला आहे. शहरात 100 जण कोरोनामुक्त झाले आहेत. शहरात 6 रुग्णांचा उपचारादरम्यान मृत्यू झाला आहे. तर शहरात सध्या 639 सक्रिय रुग्ण असून त्यांच्यावर विविध रुग्णालयात उपचार सुरू आहेत.
हेही वाचा - उजनी जलाशयाबाबतचा निर्णय; जनहित शेतकरी संघटनेचे बोंबाबोंब आंदोलन
