पंढरपूर - कोरोनाबाधित रुग्णांना खासगी रुग्णालयामध्ये वाजवी दरात उपचार मिळावेतयासाठी शासनाने उपचारासाठी आकारावयाच्या कमाल दराची मर्यादा निश्चित केली आहे. मात्र, अद्यापही काही खासगी रुग्णालयांमध्ये कोरोनाबाधित रुग्णांकडून निश्चित केलेल्या दरापेक्षा आधिक दर आकारण्यात येत असल्याच्या तक्रारी येत असल्याने नियुक्त केलेल्या लेखापरीक्षण पथकामार्फत शहरातील 15 खासगी रुग्णांलयातील 540 बिलांची तपासणी करुन 7 लाख 3 हजार 700 रुपये कमी करण्यात आले, असल्याची माहिती प्रांताधिकारी सचिन ढोले यांनी दिली.
डेडिकेटेड कोविड हेल्थ सेंटरला मान्यता -
तालुक्यात शहरासह ग्रामीण भागात कोरोनाबाधित रुग्णांची संख्या दिवसेदिवस वाढत आहे. प्रशासनाकडून कोरोनाचा प्रादुर्भाव रोखण्यासाठी विविध पातळीवर प्रयत्न केले जात आहेत. कोरोनाबाधित रुग्णांना तत्काळ उपचार मिळावेत. यासाठी प्रशासनाकडून पंढरपूर तालुक्यात 19 डेडिकेटेड कोविड हॉस्पिटल व डेडिकेडेड कोविड हेल्थ सेंटरला मान्यता देण्यात आली आहे.
शासनाच्या नियमानुसार बिलाची आकारणी -
राज्यशासनाने कोरोनाच्या उपचारासाठी चाचणी तसेच रुग्णालयातील उपचाराबाबत रक्कम निश्चित केली असतानाही खासगी रुग्णालयाकडून जादा बिलाची आकारणी केली जात असल्याच्या तक्रारी येत आहेत. खासगी रुग्णालयांनी कोरोनाबाधित तसेच इतर रुग्णांच्या उपचारासाठी शासनाने निश्चित केलेल्या दरानुसार आकारणी करावी, असे आवाहनही प्रांताधिकारी ढोले यांनी केले आहे.
गरजुंनी योजनेचा लाभ घ्यावा -
तालुक्यातील गरीब व गरजू रुग्णांचे हित डोळ्यासमोर ठेवून खासगी रुग्णालयांनी जास्तीत-जास्त गरजू रुग्णांना महात्मा फुले जन आरोग्य योजनेचाही लाभ मिळवून द्यावा असे, आवाहनही ढोले यांनी यावेळी केले आहे.
