सिंधुदुर्ग - कोरोनाच्या पार्श्वभूमीवर जिल्ह्यातील अंगणवाड्या बंद आहेत. मात्र तरी देखील बालके, स्तनदा माता आणि गरोदर स्त्रियांपर्यंत अंगणवाडी सेविकेंच्या माध्यमातून पोषण आहार पोहोचवला जात आहे. शक्य असेत तर अंगणवाडीमध्ये अथवा शक्य नसल्यास पोषण आहार घरपोहोच देण्यात येत आहे. याचा फायदा जिल्ह्यातील सुमारे 40328 लाभार्थ्यांना होतो आहे. पोषण आहारामध्ये प्रोटीनयुक्त कडधान्य, धान्य, तेल आणि मसाल्यांचे पदार्थ यांचा समावेश आहे.
सिंधुदुर्ग जिल्ह्यामध्ये जिल्हा परिषदेच्या महिला बालकल्याण विभागाच्या माध्यमातून 1587 अंगणवाड्या चालविल्या जातात. या अंगणवाड्यांच्या माध्यमातून 40328 लाभार्थ्यांना पोषण आहाराचे वाटप केल्या जाते. या लाभार्थ्यांमध्ये 6 महिने ते 6 वर्ष वयोगटातील बालकांसोबतच स्तनदा माता, गरोदर स्त्रिया यांचा समावेश आहे. या लाभार्थ्यांमध्ये 6 महिने ते 3 वर्ष वयोगटातील 16 हजार 456 बालके, तर 3 वर्ष ते 6 वर्ष वयोगटातील 18 हजार 466 बालकांचा समावेश आहे. 2098 गरोदर स्त्रिया आणि 3307 एवढी स्तनदा मातांची गरज आहे. या लाभार्थ्यांना गहू, मसूर, डाळ, सोयाबीन तेल, चणाडाळ, हळद, मिरची पावडर, तांदूळ, मीठ या गोष्टी पोषण आहाराच्या माध्यमातून दिल्या जातात.
असे होते पोषण आहाराचे वितरण
या लाभार्थ्यांमधील 2098 गरोदर स्त्रिया आणि 3307 स्तनदा माता या लाभार्थ्यांना एकूण गहू 18 हजार 199.50 किलो, मसूर डाळ 10 हजार 478.50 किलो, मिरची पावडर 1103 किलो, हळद पावडर 1103 किलो, मीठ 2206 किलो, सोयाबीन तेल 2 हजार 757.50 लिटर, चणाडाळ 1103 किलो दिली जाते. तर तीन वर्ष ते सहा वर्ष वयोगटातील 18 हजार 466 मुलांना, चणाडाळ 27 हजार 13. 50 किलो, मसूर डाळ 25 हजार 212.69 किलो, मिरची पावडर 3 हजार 601.80 किलो, हळद पावडर 3 हजार 601.80 किलो, मीठ 7 हजार 203.60 किलो, सोयाबीन तेल 9 हजार 4 लिटर, तांदूळ 55 हजार 828 किलो दिला जातो. 6 महिने ते 3 वर्ष वयोगटातील 16 हजार 456 मुलांना 45 हजार 740.80 किलो गहू, 24 हजार 504 किलो मसूर डाळ, 3 हजार 267.20 किलो मिरची पावडर, 3हजार 267.20 किलो हळद पावडर, 6 हजार 534.49 किलो मीठ, 8 हजार 168 लिटर सोयाबीन तेल, 24 हजार 504 किलो चणाडाळ दिली जाते.
अंगणवाडी बंद तरी देखील पोषण आहार पोहोचत आहे लाभार्थ्यांपर्यंत
यावेळी बोलताना जिल्हा परिषदेच्या महिला बालकल्याण विभागाचे प्रभारी उपमुख्य कार्यकारी अधिकारी अमोल पाटील म्हणाले की, कोविडचा प्रादुर्भाव असल्यामुळे सध्या जिल्ह्यातल्या अंगणवाड्या बंद आहेत. मात्र तरी देखील लाभार्थ्यांना अंगणवाडी सेविकांमार्फत पोषण आहार दिला जात आहे. पुरवठादारांच्या माध्यमातून पोषण आहार अंगणवाडी केंद्रापर्यंत पोहोचवण्यात येतो. या ठिकाणी विषम संखेमध्ये पालक उपस्थित राहतात आणि पोषण आहार घरी घेऊन जातात. ज्या ठिकाणी पालकांना अंगणवाडी केंद्रापर्यंत येणे शक्य नाही, अशा ठिकाणी अंगणवाडी सेविका लाभार्थ्यांच्या घरी पोषण आहार पोहोचवतात. पूर्वी अंगणवाड्या सुरू होत्या त्यावेळी बचत गटांच्या माध्यमातून हा आहार शिजवून दिला जात असे. मात्र आता कोरोनाचा प्रादुर्भाव असल्याने हा पोषण आहार आता लाभार्थ्यांच्या थेट घरी पोहोचवला जात आहे.
घरपोहोच मिळतो पोषण आहार
कुडाळ तालुक्यातील डिगस गावचे रहिवाशी असलेले प्रसाद बळीराम पाताडे हे सांगतात, आमची मुलगी दोन वर्षांची आहे. ती अंगणवाडीमध्ये जाते. अंगणवाडीच्या माध्यमातून मिळणारा पोषण आहार हा सध्या अंगणवाडी बंद असली तरी काहीवेळा आम्हाला घरपोहोच मिळतो. किंवा काहीवेळा आम्ही तो अंगणवाडीत जाऊन घेवून येतो. सध्या दोन महिन्यांचा पोषण आहार एकावेळी अंगणवाडीमध्ये मिळतो. यामध्ये कडधान्य, धान्य अशा विविध वस्तूंचा समावेश आहे. न चुकता हा पोषण आहार आम्हाला आजही मिळत आहे.
जिल्हा परिषदेची विशेष मोहीम
दरम्यान सिंधुदुर्ग जिल्ह्यामध्ये कोरोनाचा प्रादुर्भाव फारसा नसला तरी या ठिकाणी आजही अंगणवाड्या सुरू होऊ शकलेल्या नाहीत. किंबहुना पालक देखील आपल्या मुलांना शाळेत पाठवायला तयार नाहीत. मात्र जिल्हा परिषदेने विशेष मोहीम आखत बालकांचा, गरोदर स्त्रियांचा , स्तनदा मातांचा पोषण आहार त्यांच्यापर्यंत पोहोचवण्याची व्यवस्था केली आहे.
हेही वाचा - दाऊदचा साथीदार दानिश चिकना अटकेत
