सिंधुदुर्ग - जिल्ह्यात मान्सून सक्रिय झाला आहे. यामध्ये नदी-ओहोळातील पाण्याची पातळी वाढत असल्याने, तेथील मासे उलट्या दिशेने धाव घेत आहेत. असे मासे पकडण्यासाठी मत्स्य खवय्यांची ओहोळावर गर्दी वाढू लागली आहे.
चढणीचे मासे का म्हणतात?
एरवी काेकणात आणि डाेंगराळ भागाला लागून असलेल्या तलावांमध्ये आढळणारे चढणीचे मासे पावसाळ्यात विशेषत: पाण्याचा वेग अधिक असताना, प्रवाहाच्या विरुद्ध दिशेने पाेहून जातात. या वैशिष्ट्यामुळे या माशांना चढणीचे मासे म्हटले जाते. विणीच्या हंगामात हे चढणीचे मासे प्रवाहाच्या विरोधी दिशेने पोहून जातात आणि नेमक्या ठिकाणी अंडी घालतात.
हजाराे अंडी पाेटात घेऊन मासे पाेहतात
नद्यांच्या पाण्याला यावेळी वेग असतो, पूर-महापुरात चढणीचा उत्साह अधिक असताे. पुराच्या वेगापेक्षाही चढणीच्या माशांचा वेग अधिक असल्याने, हे मासे विरुद्ध दिशाही सहज पार करून जातात. कधी नाले तर कधी थेट शेतापर्यंत पाेहोचतात. तसेच, विणीच्या काळात हजाराे अंडी पाेटात घेऊन, हे मासे पाेहत असतात. या माशांना पकडण्यासाठी अनेकजण त्यांच्या वाटेत जाळ टाकून बसतात.
मासे पकडण्यासाठी खवय्यांची गर्दी
साधारणतः माशांचा उतरणीचा प्रवास उत्तरा नक्षत्रात, तर चढणीचा प्रवास मृग नक्षत्रात असतो. वर्षानुवर्षांचा माशांचा प्रवास प्रत्येक पिढीला ज्ज्ञात झाल्याने खवय्यांची नदी-ओहोळांवर गर्दी होते. सध्या असे मासे पकडण्यासाठी लोकांची नदी- नाल्यांवर गर्दी होताना दिसत आहे.
