सातारा - प्रतापगडाच्य‍ा रणसंग्रामात छत्रपती शिवराय‌ांच्या प्राणाचे रक्षण करणाऱ्या वीर जीवा महालांच्या वारसाचे शिक्षण तुटपुंज्या आर्थिक स्थितीमुळे अडखळले होते. 'ईटीव्ही भारत'ने त्यावर प्रकाश टाकत 19 फेब्रुवारी रोजी बातमी प्रकाशित केली होती. त्या बातमीची दखल घेत पाचगणीच्या बेल एअर रुग्णालयाने या कुटुंबाला आधार देत महालांचे वंशज प्रतीक्षा सपकाळ हिच्या दोन वर्षांच्या नर्सिंग अभ्यासक्रमाची जबाबदारी घेतली. यामुळे प्रतीक्षा सपकाळने 'ईटीव्ही भारत'चे आभार मानले.
वाई तालुक्यातील कोंढवली या छोट्य‍ाशा गावात वीर जीवा महाले य‍ांचे 14 वे वंशज प्रकाश सपकाळ, पत्नी जयश्री, मुलगी प्रतीक्षा व मुलगा प्रतीक यांसह राहतात. प्रकाश सपकाळ यांना अर्धांगवायू झाल्याने ते अंथरूणात खिळून आहेत. कुटुंबीयांच्या उदरनिर्वाहासाठी जयश्री सपकाळ या शेतात मजुरी करतात. त्यांची मुलगी प्रतीक्षाला 12 वी इयत्तेत च‍ांगले गुण मिळूनही केवळ आर्थिक परिस्थितीमुळे प्रतीक्षाला पुढचे शिक्षण घेणे कठीण झाले होते. तिला नर्स (परिचारिका) व्हायचे होते. पण, आर्थिक अडचणीमुळे नर्सिंगचा प्रवेश खोळंबला होता.
याबाबतची माहिती समजल्यानंतर 'ईटीव्ही भारत'च्या प्रतिनिधीने शिवजयंतीचे औचित्य साधून सपकाळ कुटुंबीयांवर प्रकाश झोत टाकला होता. साताऱ्यातील प्रसिद्ध आर्किटेक्ट ययाती टपळे यांनी बातमीची माहिती पाचगणीच्या बेल एअर रुग्णालयाचे संचालक फादर टॉमी यांना दिली. फादर टॉमी यांनी प्रतीक्षा व तिची आई जयश्री यांची भेट घेतली. शैक्षणिक पात्रता तपासून तिला 12 वीचे निकाल जाहीर झाल्यानंतर प्रवेश प्रक्रिया सुरु होईल. त्यावेळी 'एएनएम' या नर्सिंगच्या 2 वर्षांच्या अभ्यासक्रमाला तिला प्रवेश मिळू शकेल, असे बेल एअर रूग्मालयाचे संचालक फादर टॉमी यांनी आश्वासित केल्याचे प्रतीक्षाची आई जयश्री यांनी सांगितले.
प्रतिक्षाच्या शैक्षणिक खर्चासह होस्टेल, जेवणाचा खर्च बेल एअर रुग्णालय उचलणार आहे, असेही फादर टॉमी यांनी स्पष्ट केले.
प्रतिनिधीशी बोलताना प्रतीक्षा सपकाळने 'ईटीव्ही'चे आभार मानले. ती म्हणाली 'ईटीव्ही'ने आमची परिस्थिती जगापुढे मांडली. त्यामुळे माझ्या शिक्षणातील मोठा अडथळा दूर झाला. नर्सिंग पूर्ण करून मला रुग्णसेवा करायची आहे. तसेच स्वत:च्या पायावर उभे राहून धाकट्या भावाला पुढे शिकवायचे आहे.
जिवाजी महाला यांच्या कामगिरीची इतिहासाने 'होता जीवा म्हणून वाचला शिवा', अशी नोंद घेतली. याच जिवाजींचे वंशज आज परिस्थितीशी झगडत आहेत. त्यांचे जीवन सुखकर होण्यासाठी बेल एअरचा मोठा आधार मिळाला आहे.
नोकरीचीही घेतली जबाबदारी
वीर जीवा महालांचे इतिहासातील योगदान मोठे आहे. त्यांच्या वारसांबाबत शिवजयंती दिवशी 'ई टीव्ही'च्या वेब पोर्टलवर बातमी पाहिली. बेल एअर रुग्णालयामार्फत नर्सिंग अभ्यासक्रम चालवला जातो. इंडियन नर्सिंग काऊन्सिल व महाराष्ट्र शासनाची त्याला मान्यत‍ा आहे. आमच्याकडे 60 मुलींना हा अभ्यासक्रम मोफत शिकवला जातो. प्रतिक्षाची जेवणा-खाण्याची तसेच शैक्षणिक खर्चाची सर्व व्यवस्था येथे होईल. कोर्स पूर्ण केल्यानंतर तिला नोकरी देण्याची जबाबदारी आम्ही उचलत आहोत, बेल एअर रूग्णालयाचे फादर टॉमी यांनी सांगितले.
हेही वाचा - जिवाजी महालेंच्या वारसदारांना सोडावे लागले शिक्षण; हालाखीच्या परिस्थितीत जगताहेत आयुष्य!
