सातारा - कराडमधील सूर्यवंशी मळा येथे ड्रेनेज पाईप टाकण्यासाठी खोदण्यात आलेल्या खड्ड्यात पडल्याने दुचाकीस्वाराचा मृत्यू झाल्याची घटना घडली होती. यानंतर मंगळवार पेठेतील एका वळणावरही याच प्रकारचा खड्डा करण्यात आला होता. संबंधित खड्ड्यात रातोरात जेसीबीने भराव टाकून त्यावर मुख्याधिकार्‍यांचे छायाचित्र ठेऊन पुष्पहार घालण्यात आल्याचा प्रकार बुधवारी (दि.१३नोव्हेंबर)ला सकाळी उघडकीस आला. या घटनेमुळे कराडमध्ये खळबळ उडाली आहे. पालिकेच्या बेजबाबदार कारभाराचा निषेध म्हणून अज्ञातांनी केलेल्या या कृत्याची कराडमध्ये चर्चा रंगली आहे.
नगरपालिकेतर्फे ड्रेनेज लाईनचे काम सुरू आहे. त्यासाठी सूर्यवंशी मळा परिसरात पाईप टाकण्यासाठी मोठी चर खोदण्यात आली. मंगळवारी(दि.12नोव्हेंबर)ला विजय पांडुरंग शिंदे नावाचा दुचाकीस्वार या खड्ड्यात पडून मृत्यू पावला होता.
दरम्यान, मंगळवारी रात्री याच प्रकारच्या एका खड्ड्यात काही दुचाकीस्वार पडल्याच्या घटना समोर आल्या. यामुळे दक्षतेचा उपाय म्हणून नागरिकांनी रात्रीच जेसीबीने त्यामध्ये भराव टाकला. मात्र, या खड्ड्यावर अज्ञाताने नगरपालिकेचे मुख्याधिकारी यशवंत डांगे यांचे छायाचित्र ठेऊन त्याला पुष्पहार घातला आहे.
संबंधित प्रकाराची माहिती मिळताच नगरपालिकेच्या आरोग्य कर्मचार्‍यांनी घटनास्थळी पोहोचून मुख्याधिकार्‍यांचे छायाचित्र हटवले. यशवंत डांगे यांच्या कार्यकाळात कराड नगरपालिकेने स्वच्छता सर्वेक्षणात देशपातळीवरील प्रथम क्रमांकाचा पुरस्कार पटकावला. यानंतर सरकारचा कोट्यवधी रुपयांचा निधी पालिकेला मिळाला. स्वच्छतेसोबतच घनकचरा प्रक्रिया प्रकल्प, कचरा डेपोच्या ठिकाणी बगीचा, स्वच्छ-सुंदर कराडसाठी वेगवेगळे प्रयोग डांगे यांनी राबवले. स्वच्छतेसाठी स्वत: रस्त्यावर उतरून नागरिकांनाही त्यांनी प्रोत्साहित केले. त्यामुळे ते कराडकरांमध्ये ते लोकप्रिय झाले.
परंतु, ही घटना घडल्यानंतर, मुख्याधिकार्‍यांच्या फोटोला हार घालून त्यांचे मनोबल खच्ची करण्याचा केलेला प्रयत्न म्हणजे विकृत मनोवृत्तीचे लक्षण असून, त्याचा निषेध करत असल्याचे पत्रक नगरपालिका कर्मचारी संघटनेने प्रसिद्ध केले. विजय पांडुरंग शिंदेंचा मृत्यू दुर्दैवी असून, नगरपालिकेसह सर्व कर्मचारी त्यांच्या कुटुंबीयांच्या दु:खात सहभागी असल्याचे यावेळी कर्मचाऱ्यांच्या वतीने सांगण्यात आले.
घटनेबाबत कराड शहर पोलीस तपास करून दोषींवर कारवाई करतील, असे संघटनेने पत्रकात म्हटले आहे. कामं करताना नागरीकांच्या सुरक्षेची काळजी घेण्याची सूचना पालिकेतर्फे ठेकेदारांना देण्यात आल्या आहेत. नगरपालिका यापुढे सर्व बाबींची अधिक खबरदारी घेणार असून, कोणत्याही कामाच्या ठिकाणी अपघात होणार नाही, याची दक्षता घेण्यात येणार असल्याचे संघटनेने पत्रकात नमूद केले आहे.
