Gangs of Satara : सातार्‍यातील दोन टोळ्या हद्दपार, आतापर्यंत 98 जणांवर कारवाई

गंभीर गुन्हे नोंद असणार्‍या दोन टोळ्यातील ( Gangs of Satara ) सहा जणांना संपूर्ण सातारा जिल्हा तसेच पुणे, सोलापूर आणि सांगली जिल्ह्यातील सात तालुक्यातून हद्दपार करण्यात आले आहे. पोलीस अधीक्षक ( Police Superintendent of Satara ) अजय कुमार बन्सल यांच्या कार्यकाळात हद्दपार करण्यात आलेल्या गुंडांची संख्या 98 वर पोहोचली आहे

कराड (सातारा) - सातारा पोलीस अधीक्षकांनी ( Police Superintendent of Satara ) नव्या वर्षाच्या सुरुवातीलाच दोन टोळ्यांना एक वर्षासाठी हद्दपार करत गुन्हेगारांना दणका दिला आहे. उंब्रज आणि लोणंद पोलीस ठाण्याच्या हद्दीत गंभीर गुन्ह्यांची नोंद असणार्‍या दोन टोळ्यातील सहा जणांना संपूर्ण सातारा जिल्हा तसेच पुणे, सोलापूर आणि सांगली जिल्ह्यातील सात तालुक्यातून हद्दपार करण्यात आले आहे. पोलीस अधीक्षक बन्सल यांच्या कार्यकाळात हद्दपार करण्यात आलेल्या गुंडांची संख्या 98 वर पोहोचली आहे..

गंभीर गुन्ह्यांची नोंद - लोणंद पोलीस ठाण्याच्या ( Lonand Police Station ) हद्दीत खून, दुखापत करुन दरोडा, जबरी चोरी, पेट्रोल चोरी, बेकायदा हत्यार बाळगणे आणि मालमत्तेसंदर्भातील गंभीर गुन्हे नोंद असणार्‍या राकेश उर्फ सोन्या भंडलकर आणि सौरभ जगताप यांना सातारा जिल्ह्यातून तडीपार करण्याबाबत लोणंदचे सहायक पोलीस निरीक्षक विशाल वायकर यांनी हद्दपार प्राधिकरणाकडे प्रस्ताव सादर केला होता. त्यावर निर्णय देताना पोलीस अधीक्षक अजय कुमार बन्सल यांनी दोन्ही गुन्हेगारांना सातारा जिल्हा तसेच पुणे जिल्ह्यातील पुरंदर, भोर आणि सोलापूर जिल्ह्यातील माळशिरस तालुक्यातून दोन वर्षांसाठी हद्दपार करण्याचा आदेश दिला आहे.

उंब्रज परिसरातील टोळीलाही दणका - उंब्रज पोलीस ठाण्याच्या ( Umbraj Police Station ) हद्दीत खुनासाठी अपहरण, गर्दी मारामारी, शारिरीक इजा करण्यासारखे अनेक गुन्हे नोंद असलेल्या अक्षय पाटोळे, राहूल जाधव, शरद चव्हाण, प्रसाद जाधव या टोळीला सातारा जिल्ह्यातून तडीपार करण्याचा प्रस्ताव उंब्रजचे सहायक पोलीस निरीक्षक अजय गोरड यांनी हद्दपार प्राधिरणाकडे दाखल केला होता. त्यानुसार पोलीस अधीक्षक अजय कुमार बन्सल यांनी या टोळीला सातारा जिल्हा आणि सांगली जिल्ह्यातील कडेगाव, खानापूर, वाळवा, शिराळा या चार तालुक्यांच्या हद्दीतून एक वर्षासाठी हद्दपार केले आहे.

आतापर्यंत 98 जण हद्दपार - सातारा जिल्हा पोलीस अधीक्षकपदाचा कार्यभार घेतल्यापासून पोलीस अधीक्षक अजय कुमार बन्सल यांनी हद्दपारीच्या 39 प्रस्तावांवर आदेश देत 98 जणांना सातार्‍यासह नजीकच्या जिल्ह्यातील तालुका हद्दीतून तडीपार केले आहे. पोलीस अधीक्षक बन्सल यांनी आपल्या आतापर्यंतच्या काळात 98 गुंडांना हद्दपार करत अनेक टोळ्यांचे कंबरडे मोडले आहे. त्यामुळे लवकरच सातारा जिल्ह्यातील गुंडांच्या हद्दपारीचे शतक होणार आहे.

हेही वाचा - Assembly Election 2022 : काँग्रेसने पृथ्वीराज चव्हाणांकडे दिली 'या' तीन राज्यातील प्रचाराची जबाबदारी