कराड (सातारा) - राज्यात सर्वात प्रथम कराड तालुक्यातील सह्याद्री सहकारी साखर कारखान्याने १५० बेडचे कोविड सेंटर उभारले आहे. दोन दिवसांत हे कोविड सेंटर शासनाकडे हस्तांतर केले जाणार आहे. या सेंटरमध्ये ५० रुग्णांसाठी ऑक्सिजन बेड आणि १०० रूग्णांवर विलगीकरणासह उपचार करता येईल, असा कक्ष तयार केला आहे. कारखान्याचे संचालक तथा राज्याचे सहकार मंत्री बाळासाहेब पाटील यांचे सुपूत्र जशराज पाटील यांनी शनिवारी पत्रकारांना याबाबतची माहिती दिली.
महाराष्ट्राचे पहिले मुख्यमंत्री, दिवंगत यशवंतराव चव्हाण यांच्या प्रेरणेने सह्याद्री सहकारी साखर कारखान्याची स्थापना झाली. दिवंगत पी. डी. पाटील हे कारखान्याचे संस्थापक अध्यक्ष होते. त्यांच्या दूरदृष्टीने कारखाना कार्यक्षेत्रातील हजारो हेक्टर क्षेत्र ओलिताखाली आले. शेतकरी हिताच्या योजना राबवत त्यांनी राज्यात सह्याद्री पॅटर्न निर्माण केल्याचे जशराज पाटील म्हणाले. कोरोनाच्या संकटकाळात सहकारी साखर कारखान्यांनी कोविड सेंटर्स उभारावेत, असे आवाहन राष्ट्रवादीचे अध्यक्ष शरद पवार यांनी केले होते. त्याला प्रतिसाद देत राज्यात सर्वात प्रथम कराडच्या सह्याद्री कारखान्याने सह्याद्री कृषी अभियांत्रिकी महाविद्यालयात कोविड सेंटर उभारले असल्याचे जशराज पाटील म्हणाले.
हेही वाचा - बदलीचा निरोप समारंभ आटोपून परतणाऱ्या पोलीस कर्मचाऱ्याचा अपघातात मृत्यू
या कोविड सेंटरमध्ये ५० रुग्णांसाठी ऑक्सिजन बेडची सुविधा आहे. तसेच १०० रूग्णांवर विलगीकरणासह उपचाराच्या स्वतंत्र कक्षाची व्यवस्था करण्यात आलेली आहे. रूग्णांना पिण्याचे गरम पाणी, साबण, टूथ ब्रश, वाफारा मशीन पुरवण्यात येणार आहेत. दरम्यान, शासनाने केलेल्या आवाहनानुसार एप्रिल महिन्यात सह्याद्री कारखान्याने सॅनिटायझरची निर्मिती केली. ग्रामपंचायती, शाळा, महाविद्यालये, शासकीय कार्यालयांना नाममात्र १०० रूपये प्रतिलिटर दराने सॅनिटायझर उपलब्ध करून दिले. कारखान्यातर्फे आशा सेविका आणि पोलीस कर्मचार्‍यांना 2 हजार लिटर सॅनिटायझरचे मोफत वाटप केल्याचेही जशराज पाटील यांनी सांगितले.
हेही वाचा - 'लक्ष्मीबाई, वीर शिवाजी यांच्या पावलावर पाऊल ठेवून कार्य करत राहीन' कंगनाचं आणखी एक ट्विट
