सातारा - छत्रपती शिवाजी महाराजांचा दिल्लीच्या दरबारात अपमान झाला. त्यानंतर ते दरबारातून निघून गेले आणि आता? मी एवढचं म्हणेन हे वागणं बरं नव्हे, असा उपरोधिक टोला राष्ट्रवादीचे अध्यक्ष शरद पवार यांनी उदयनराजे भोसले यांना लगावला. उदयनराजेंनी भाजप प्रवेश केल्यानंतर पवार पहिल्यांदाच साताऱ्यात आले होते. यावेळी त्यांनी उदयनराजेंवर भाष्य केले.
मोठ्या कारखानदारांचे सरकारने 85 हजार कोटी रुपयांचे कर्ज माफ केले आहे. मात्र, दुष्काळी परिस्थिती आणि महापुराच्या संकटाकडे बघायला सरकार तयार नाही. दुसरीकडे किल्ले सरकारने विकायला काढले. त्या ठिकाणी छम छम वाजवण्याची सरकार काम करत आहे. ज्या किल्ल्यांवर स्वाभिमानाचा इतिहास घडला तिथे हॉटेल आणि बार उभे करण्याचे नियोजन हे सरकार करत आहे, असे पवार म्हणाले. पुरंदरच्या तहानंतर मिर्झाराजे जयसिंग यांनी शिवाजी महाराजांना दिल्लीचे आमंत्रण दिले. दरबारात सन्मान होईल, असा शब्द दिला. पण, महाराज दिल्लीत गेल्यानंतर त्यांना दरबारात मागे बसवले. महाराज तेथून बाहेर पडले. त्यानंतर त्यांना कैद करण्यात आले. मात्र, राजे त्यातूनही सुटले आणि महाराष्ट्रात परत येऊन त्यांनी इतिहास घडवला. त्यामुळे ‘हे वागणं बरं नव्हं.’ असे म्हणत पवारांनी उदयनराजेंवर टीका केली.
हेही वाचा - महाराजांच्या तलवारी चमकल्या तिथे राज्य सरकार छमछमचा आवाज करणार - शरद पवार
मी अजून म्हातारा झालो नाही
मला अनेक जण 80 वर्षांचा म्हातारा तर कोणी वयस्कर झालेत, असे म्हणतात. कुणी सांगितले, मी म्हातारा झालो. आज देखील मी 20 तास काम करू शकतो. मी महाराष्ट्र चुकीच्या हातात जाऊ देणार नाही. 'काळ्या आईची राखण करणाऱ्या शेतकऱ्यांना देशोधडीला लावले आहे. अशा या सरकारला पुन्हा सत्ता मिळू देणार नाही, असे पवार म्हणाले.
हेही वाचा - समाजस्वास्थ बिघडवणाऱ्या भाजपला 'चले जाव' म्हणायची वेळ - शरद पवार
मी चुकलो, जयंत पाटलांचा सल्ला ऐकला नाही
उदयनराजेंचे नाव न घेता जयंत पाटील यांचा सल्ला मी ऐकला नाही, अशी कबुली पवारांनी दिली. ते म्हणाले, पाटील यांचा सल्ला न ऐकण्याचे कारण एवढेच होते, की आम्हाला छत्रपतींच्या गादीचा अभिमान आहे. ती गादी शिवबाची आहे. त्यांनी ते करावे पण, मी चुकलो. मला आता त्यावर फारसे बोलायचे नाही. कारण, वेगळा मार्ग स्वीकारायचा हा त्यांना लोकशाहीने अधिकार दिला आहे.
