सातारा - एटीएम मशीनमध्ये छेडछाड करून लाखो रुपयांवर डल्ला मारणार्‍या आंतरराज्य टोळीचा शाहूपुरी पोलिसानी पर्दाफाश केला. महाराष्ट्रासह गुजरात, कर्नाटक, मध्य प्रदेश, हरियाणा, राजस्थान, उत्तर प्रदेश राज्यात कार्यरत असलेल्या या टोळीचा म्होरक्या, साथीदारांसह सातारा पोलिसांच्या हाती लागला आहे. हरियाणामध्ये त्याच्या मुसक्या आवळत पोलिसांनी त्यांची वरात सातारपर्यंत आणली. सकरुद्दीन फैजरु (वय ३६) आणि रवि ऊर्फ रविंदर चंदरपाल (वय 33 दोघेही रा. पलवल हरियाणा) अशी अटक केलेल्या संशयितांची नावे आहेत. या दोघांना न्यायालयाने तीन दिवस पोलिस कोठडी सुनावली आहे. हरियाणामध्ये कारमधून पळून जाण्याच्या प्रयत्नात असताना शाहूपुरी पोलिसांनी पाठलाग करून या दोघांना ताब्यात घेतले. त्यांच्याकडून दोन लाखांची रोकड आणि कार जप्त केली आहे.
पोलिसांनी दिलेल्या माहितीनुसार, 20 व 21 सप्टेंबर रोजी राधिका चौकातील कॅनरा बँकच्या एटीएम मशिनशी छेडछाड करुन अनोळखी चोरट्यांनी हातचलाखीने 2 लाखाची रक्कम काढून नेले होते. यात बँकेची फसवणुक झाली होती. बँकेच्या मॅनेजरने दिलेल्या फिर्यादीवरुन शाहूपुरी पोलीस ठाण्यात 5 ऑक्टोबर रोजी गुन्हा दाखल झाला होता. या गुन्ह्याची माहिती घेत असताना जिल्ह्यात काही दिवसांपासून बँकांचे एटीएममधून हातचलाखीने मोठ्या प्रमाणावर रोख पैसे काढण्याचे प्रकार होत असल्याचे निदर्शनास आले.
सहाय्यक पोलीस निरिक्षक विशाल वायकर, संदीप शितोळे व गुन्हे प्रकटीकरण शाखेने कॅनरा बँक राधिका रोड सातारा येथे भेट देवून पाहणी केली. त्या ठिकाणचे व परिसरातील सीसीटीव्ही फुटेज तपासले. फुटेज व तांत्रिक बाबींचे विश्‍लेषण करुन आरोपीबाबत महत्वपूर्ण धागेदोरे मिळाले. गुन्ह्यातील संशयित हरियाणा राज्यातील असल्याची व त्यांनी महाराष्ट्रासह गुजरात, कर्नाटक, राजस्थान, मध्यप्रदेश, उत्तर प्रदेश, हरियाणा राज्यात मोठ्या प्रमाणावर एटीएममध्ये छेडछाड करुन हातचलाखीने डल्ला मारल्याची धक्कादायक माहिती समोर आली.
शाहूपुरी गुन्हे प्रकटीकरण शाखेचे सहाय्यक निरिक्षक संदीप शितोळे, स्वप्निल कुंभार, मोहन पवार, पंकज मोहिते यांचे पथक हरियाणाला रवाना झाले. या पथकाने संशयितांची कौशल्याने माहिती काढली. कारमधून पळून जात असतांना दोन्ही संशयितांना स्थानिक पोलिसांच्या मदतीने पाठलाग करुन पकडले. या दोघांनी सातारा, कोल्हापूर, पुणे, मुंबई आदी ठिकाणीही धुमाकूळ घातला असल्याचे तपासात समोर आले. या दोन संशयितांनी तब्बल 704 वेळा एटीएम मधून पैसे चोरल्याचे स्पष्ट झाले आहे. दोघांनी महाराष्ट्रात 440, गुजरात 64, कर्नाटक 102, राजस्थान 24, मध्यप्रदेश 29, उत्तर प्रदेश 2, हरियाणा 43 असे एकूण 704 वेळा एटीएममधून लाखो रुपयांवर डल्ला मारला आहे.
