सातारा : पुणे-बंगळुरू महामार्गावर गोवा बनावटीच्या दारूची वाहतूक करणाऱ्या दोघांना राज्य उत्पादन शुल्क विभागाने पकडले आहे. त्यांच्याकडून चारचाकी वाहन, दोन मोबाईल विदेशी मद्याचे 110 बॉक्स, असा १७ लाखांचा मुद्देमाल जप्त करण्यात आला आहे. याप्रकरणी अजय वसंत कुळधरण, साहिल रामदास धात्रक (रा. पिंपरी लोके, ता. राहाता, जि. अहमदनगर) यांना अटक करण्यात आली आहे.
दारू लपविण्यासाठी कॅरेटचा वापर : राज्य उत्पादन शुल्क विभागाचे उपायुक्त विजय चिंचाळकर, अधीक्षक श्रीमती किर्ती शेडगे यांच्या मार्गदर्शनाखाली महामार्गावर नांदलापूर (ता. कराड) गावच्या हद्दीत ही कारवाई करण्यात आली आहे. महिंद्रा कंपनीच्या पिकअप गाडीचा (क्र. MH-17-BY-9437) संशय आल्याने वाहनाची तपासणी करण्यात आली. आंब्याच्या कॅरेटमध्ये लपवून ठेवलेले गोवा बनावटीच्या दारूचे एकूण 110 बॉक्स (1 हजार 320 सिलबंद बाटल्या) आढळून आले.
मुद्देमाल जप्त, दोघांना अटक : या कारवाईत चारचाकी वाहन, दोन मोबाईल, गोवा बनावटीचा मद्यसाठा, असा एकूण 17 लाख 37 हजार रूपयांचा मुद्देमाल जप्त करण्यात आला. याप्रकरणी अजय वसंत कुळधरण, साहिल रामदास धात्रक यांना अटक करण्यात आली आहे.
कराडच्या पथकाचे कौतुक : उत्पादन शुल्क विभागाच्या कराडमधील पथकाने केलेल्या कारवाईबद्दल विभागीय उपायुक्त विजय चिंचाळकर, अधीक्षक श्रीमती किर्ती शेडगे यांनी कौतुक केले. कराडचे दुय्यम निरीक्षक व्ही. बी. शिंदे, पी. व्ही. नागरगोजे, सहाय्यक दुय्यम निरीक्षक पी. आर. गायकवाड, जवान विनोद बनसोडे यांनी ही कारवाई केली. दुय्यम निरीक्षक व्ही. बी. शिंदे हे पुढील तपास करत आहेत.
हेही वाचा - Bhiwandi Fire Broke : भिवंडीत भंगाराच्या गोदामांना आग, 17 गोदामं जळून खाक
