सातारा - मांढरदेव येथील मंदीर 13 जानेवारी ते 13 फेब्रुवारीपर्यंत दर्शनासाठी बंद राहणार आहे. जानेवारी महिन्यातील 27, 28 व 29 रोजी पौष पौर्णिमेला भरणारी देवीची मुख्य यात्रा कोरोनाच्या पार्श्वभूमीवर रद्द करण्यात आली आहे. जिल्हाधिकाऱ्यांच्या आदेशानुसार यात्रेतील धार्मिक विधी, पूजाअर्चा रुढी परंपरेनुसार स्थानिक पातळीवरील देवस्थानचे ट्रस्टी, मंदिर पुजारी व ग्रामस्थ अशा मोजक्याच भाविकांनी करण्याच्या सूचना प्रांताधिकारी संगीता राजापूरकर -चौगुले यांनी दिल्या आहेत.
सात ते आठ लाख भाविकांचा राबता
मांढरदेव येथील काळुबाई ही महाराष्ट्रासह इतर राज्यातील लाखो भाविकांचे श्रद्धास्थान आहे. जानेवारी महिन्यात पौष पौर्णिमेला देवीची यात्रा भरते. 27, 28 व 29 रोजी देवीची मुख्य यात्रा आहे. मात्र महिनाभर देवीचा यात्रोत्सव चालतो. कोरोनामुळे यात्रा, जत्रांसह गर्दी होणारे सार्वजनिक उत्सव रद्द करण्यात आले आहेत. कोरोनाचा प्रादुर्भाव वाढू नये यासाठी जिल्ह्यातील यात्रा, जत्रांसाठी प्रशासनाकडून अद्याप परवानगी देण्यात आलेली नाही.
बैठकीत झाला निर्णय
मांढरगडावर यात्रा कालावधीत मोठ्या संख्येने भाविक येणार ही बाब लक्षात घेऊन प्रशासनाने बैठक घेऊन यात्रा रद्द करण्याचा निर्णय घेतला आहे. यात्रेसंदर्भात घेण्यात आलेल्या बैठकीस तहसीलदार रणजीत भोसले, उपविभागीय पोलीस अधिकारी डॉ. शीतल खराडे, गटविकास अधिकारी उदय कुसुरकर, पोलीस निरीक्षक आनंदराव खोबरे, देवस्थानचे सचिव रामदास खामकर यांची प्रमुख उपस्थिती होती. कोरोनाच्या पार्श्वभूमीवर यावर्षी राज्यातील बहुतांश यात्रा रद्द करण्यात आल्या आहेत. याच अनुषंगाने मांढरदेव येथील यात्रा रद्द करण्याबाबत पूर्व नियोजन बैठक घेऊन मंदिर पुजारी, स्टाँलधारक व मांढरदेव ग्रामस्थ, देवस्थानचे विश्वस्त यांच्या उपस्थितीत हा निर्णय जाहीर करण्यात आला.
महिनाभर 'देऊळबंद'
13 जानेवारी ते 13 फेब्रुवारी हा संपूर्ण पौष महिना दर्शनासाठी मंदिर पूर्णपणे बंद ठेवण्याचा निर्णय या बैठकीत जाहीर करण्यात आला. दरवर्षी यात्रेसाठी बाहेरगावाहून येणारे व्यावसायिक मांढरदेव गावात येणार नाहीत व मांढरदेवसह परिसरातील यात्रा निमित्ताने पाहुण्यांना बोलावू नये याही दृष्टीने दुकानदार व ग्रामस्थांनी काळजी घ्यावी, अशा सूचना प्रांताधिकारी यांनी दिल्या.
हेही वाचा - बाळासाहेब थोरातांकडेच राहणार काँग्रेसचे प्रदेशाध्यक्षपद?
