कराड (सातारा) - महाराष्ट्र, कर्नाटकसह आंध्रप्रदेश राज्यासाठी वरदायिनी असलेल्या कोयना धरण परिसरात पावसाला सुरूवात झाली आहे. कोयना धरण पाणलोट क्षेत्रात शुक्रवारी (दि. 11 जून) दमदार पाऊस झाला असून पाण्याची आवकही सुरू झाली आहे. या वर्षातील पहिल्याच दिवशी कोयना धरणात प्रति सेकंद 1 हजार 282 क्युसेक पाण्याची आवक झाली आहे.
हवामान खात्याने दिलेल्या माहितीनुसार कमी दाबाचा पट्टा आणि मान्सूनचे आगमन याचा परिणाम म्हणून कोयना धरण पाणलोट क्षेत्रात शुक्रवारी सकाळपासून दमदार पाऊस झाला. 105.25 टीएमसी पाणी साठवण क्षमता असणार्‍या कोयना धरणाच्या पाणीसाठ्यात वाढ होऊ लागली आहे. चोवीस तासात कोयनानगर येथे 29 तर महाबळेश्वर येथे 46 मिलीमीटर पावसाची नोंद झाली.
सध्या कोयना धरणातील पाणी पातळी 2 हजार 73 फूट इतकी झाली आहे. तसेच धरणात प्रति सेकंद 1 हजार 282 क्युसेक पाण्याची आवकही सुरू झाली आहे. कोयना धरणाच्या तांत्रिक वर्षातील ही पहिलीच आवक आहे. शुक्रवारी सकाळी 8 वाजेपर्यंत कोयना धरणातील पाणीसाठा 28.19 टीएमसी इतका झाला आहे.
कराड तालुक्यात चोवीस तासात 153 मिलीमिटर पावसाची नोंद
कराड शहर आणि तालुक्यातही पाऊस सक्रिय झाला आहे. शुक्रवारी दिवसभरात कराड तालुक्यात सरासरी 153 मिलीमीटर पावसाची नोंद झाली आहे. कराड, सैदापूर मंडलमध्ये प्रत्येकी 10, मलकापूरमध्ये 12, कोपर्डे हवेली मंडलात 14, मसूर 18, उंब्रज 15, शेणोली 12, कवठे 18, काले 3, कोळे 12, उंडाळे 13, सुपने 7, इंदोली 9 मिलीमीटर पावसाची नोंद झाली आहे. कराड उत्तरेतील मसूर आणि कवठे या मंडलामध्ये सर्वाधिक 18 मिलीमीटर पाऊस झाल्यामुळे शेतकरी सुखावले आहेत. कराडच्या उत्तरेतील हा भाग दुष्काळी समजला जातो. या भागात चांगला पाऊस झाल्यामुळे पेरणीच्या कामाला वेग आला आहे.
हेही वाचा - कोविड वॉर्डमधून परिचारिकेने चोरलेले दोन तोळ्याचे मंगळसूत्र जप्त
