सातारा - गर्दी करून विहिरीत पोहायला जाणे युवकांच्या चांगलेच अंगलट आले आहे. याप्रकरणी उंब्रज (ता. कराड) येथील ७ युवकांवर जमावबंदी आणि संचारबंदी आदेशाचा भंग केल्याप्रकरणी गुन्हा दाखल केला आहे. तसेच विनाकारण दुचाकीवरून फिरणाऱ्या मसूर (ता. कराड) येथील दोन युवकांवरही गुन्हा दाखल करण्यात आला आहे.
पोलिसांनी दिलेली माहिती अशी, की उंब्रजच्या माणिक चौकातील ७ युवक रविवारी गावाजवळच्या विहिरीत पोहायला गेले होते. त्यांच्यावर पोलिसांनी संचारबंदीत गर्दी करून पोहायला गेल्याप्रकरणी गुन्हा दाखल केला आहे. अक्षय बापूसाहेब जाधव, प्रसाद सुधाकर जाधव, संभाजी दिलीप जाधव, योगेश रवींद्र घाडगे, ओंकार रवींद्र घाडगे, वैभव भिकू रावते आणि किशोर विजय पाटणकर (रा. माणिक चौक, उंब्रज, ता. कराड), अशी त्यांची नावे आहेत. हे सर्व युवक २० ते २५ वयोगटातील आहेत.
संचारबंदी असताना विनाकारण दुचाकीवरून फिरताना सापडलेल्या दोन युवकांवरही संचारबंदी आदेशाचा भंग केल्याप्रकरणी गणेश रघुनाथ जाधव आणि सनी राजेंद्र मोहिते (रा. मसूर, ता. कराड) या दोघांवरही गुन्हा दाखल करण्यात आला आहे.
मटण विक्रेत्यावरही नोंदवला गुन्हा
बोकड कापून मटण विक्री केल्याप्रकरणीही उंब्रज पोलिसांनी मटण विक्रेता सूरज शब्बीर मुल्ला याच्यावर गुन्हा दाखल केला आहे. कोरोनाच्या पार्श्वभूमीवर जमावबंदी आणि संचारबंदी आहे. तसेच सातारा जिल्हाधिकाऱ्यांनी मांस, मासे विक्रीवर बंदी कायम ठेवली आहे. तरीही मटण विक्री करून आदेशाचा भंग केल्यामुळे पोलिसांनी त्याच्यावर गुन्हा दाखल केला आहे.
