सातारा Durga Procession In Satara : दुर्गादेवीच्या मिरवणुकीत ट्रॅक्टर ट्रॉलीमध्ये ठेवलेल्या जनरेटरचा स्फोट होऊन 8 मुलं भाजून गंभीर जखमी झाली आहेत. ही घटना महाबळेश्वरमध्ये मंगळवारी रात्री घडली. आता या घटनेचं सीसीटीव्ही फुटेज समोर आलं आहे. त्यामध्ये स्फोटानंतर जनरेटरनं घेतलेला पेट आणि नागरिकांची पळापळ स्फोटाची भयावहता दाखवते.
अंगावरील कपड्यांनी घेतला पेट : स्फोट झाल्यानंतर जनरेटरनं पेट घेतला. त्यामुळे आजुबाजुला असणाऱ्या मुलांच्या अंगावरील कपडे पेटले. त्यामुळे आठ मुलं भाजून गंभीर जखमी झाली. त्यांना साताऱ्यातील खासगी रुग्णालयात दाखल करण्यात आलं. कोणाचं तोंड तर कोणाची पाठ भाजली आहे. जखमी मुलं आणि मुली आठ ते दहा वयोगटातील आहेत. तीन मुलं जास्त भाजली आहेत. त्यांना पुण्याला हलवलं आहे. या घटनेमुळे दुर्गादेवीच्या मिरवणुकीला गालबोट लागलं आहे.
जनरेटरच्या पाईपमधून पेट्रोल गळती : महाबळेश्वर इथं मंगळवारी रात्री दुर्गादेवीची सवाद्य मिरवणूक सुरू होती. ट्रॅक्टर ट्रॉलीमधील जनरेटरचा भीषण स्फोट झाला. यामध्ये आसपास असलेली आठ मुलं आणि मुली भाजून गंभीर जखमी झाली. तोंड आणि पाठ भाजल्यानं त्यांना साताऱ्यातील खासगी रुग्णालयात दाखल करण्यात आलं आहे. जनरेटरच्या पाईपमधून पेट्रोलची गळती होऊन जनरेटरचा स्फोट झाल्याची प्राथमिक माहिती समोर आली आहे.
स्फोटानंतर झाली पळापळ : महाबळेश्वरमधील दुर्गा उत्सव समितीची दुर्गा देवी विसर्जन मिरवणूक सुरू असताना ही दुर्घटना घडली. मिरवणुकीमध्ये लहान मुलं सुद्धा सहभागी झाली होती. वाजत-गाजत मिरवणूक सुरू असताना अचानक ट्रॅक्टर ट्रॉलीमधील जनरेटरच्या पेट्रोल पाईपचा स्फोट झाला. स्फोटानंतर कोळी गल्लीत एकच पळापळ झाली.
अंगावरील कपडे जळाल्यानं मुलं भाजली : महाबळेश्वरमधील दिलीप रिंगे यांच्या घरासमोर मिरवणूक आली असताना जनरेटरच्या पेट्रोल पाईपला गळती लागली. जनरेटरने पेट घेतला आणि स्फोट झाला. या स्फोटात मुलांच्या अंगावरील कपडे जळाल्यानं आठ मुलं गंभीर भाजली. जखमी मुलांवर महाबळेश्वर ग्रामीण रुग्णालयात प्राथमिक उपचार केल्यानंतर त्यांना सातारा येथील खासगी हॉस्पिटलमध्ये दाखल करण्यात आलं. या घटनेची माहिती मिळताच प्रांताधिकारी राजेंद्र कुमार जाधव, तहसीलदार तेजस्विनी पाटील यांनी डॉक्टरांशी संपर्क साधून जखमी मुलांची माहिती घेतली.
हेही वाचा :
