सातारा - काँग्रेस, राष्ट्रवादीला प्रचारासाठी भाडोत्री माणसं आणावी लागतात, असे म्हणत मुख्यमंत्री देवेंद्र फडणवीस यांनी आघाडीवर निशाणा साधला. साताऱ्यात आलेल्या रेल्वे इंजिनची तर आम्ही विधानसभा निवडणुकीतच बॅटरी काढली होती. तेच बंद पडलेले इंजिन राष्ट्रवादीने आणले असल्याचे म्हणत मुख्यमंत्र्यांनी राज ठाकरेंनाही टोला लगावला. ही निवडणूक गल्लीची नसून दिल्लीची असल्याचेही मुख्यमंत्री म्हणाले.
सातारा येथील गांधी मैदानावर शिवसेनेचे उमेदवार नरेंद्र पाटील यांच्या प्रचारार्थ आयोजित सभेत फडणवीस बोलत होते. यावेळी राज्य सहकार परिषदेचे अध्यक्ष शेखर चरेगावकर, उमेदवार नरेंद्र पाटील, पुरुषोत्तम जाधव, माजी आमदार मदन भोसले, माजी आमदार सदाशिवराव सपकाळ उपस्थित होते.
सातारा जिल्ह्यात पाणी देण्यासाठी केंद्र आणि राज्य सरकारने मोठा निधी दिला आहे. खासदार उदयनराजे भोसलेंना विचारा की त्यांच्या सरकारमध्ये कीती कामे झाली ? उदयनराजे जी कामे सांगत आहेत ती 2014 नंतर झाली असल्याचे मुख्यमंत्री म्हणाले.
नरेंद्र पाटीलांचा उदयनराजेंवर आरोप
खासदारांनी २३ प्रश्नांची उत्तरे दिली नाहीत. त्यांच्यासाठी संसद साताऱ्यात आना म्हणजे ते राजवाड्यातून संसदेत जातील व तिथून परत घरी येथील असे म्हणत नेरेंद्र पाटलांनी उदयनराजेंवर टीका केली. पालिकेत तर त्यांनी काळा धंदा सुरू केला आहे. लोकांना चांगले जगता येत नाही. टोलनाक्यावर गुंड पैसे वसुली करत असल्याचा आरोपही पाटील यांनी केला.
