सांगली - लोकसभा निवडणुकीच्या तिसऱ्या टप्प्यातील मतदान मंगळवारी पार पडले. सांगली मतदारसंघात अत्यंत चुरशीने झालेल्या या निवडणुकीत ६५ टक्के मतदान झाले आहे. गतवेळ पेक्षा यंदा १ टक्का मतदान वाढल्याने हा वाढलेले टक्का कोणाला धक्का देणार, याबाबत प्रचंड उत्सुकता लागून राहिली असून २३ मे रोजी याचा फैसला होईल आणि सांगलीच्या मतदाराने आपला खासदार म्हणून कोणाला निवडले याचेही चित्र स्पष्ट होईल.
तिसऱ्या टप्प्यातील सांगली लोकसभेसाठी मंगळवारी मोठ्या उत्साहात मतदान प्रक्रिया पार पडली आहे. ईव्हीएम मशीनमधील बिघाडामुळे उडालेला गोंधळ वगळता मतदारसंघात सर्वत्र शांततेत मतदान पार पडले आहे. यंदाच्या या मतदारसंघात निवडणूक रिंगणात १२ उमेदवार होते. मात्र, खरी लढत भाजप, स्वाभिमानी शेतकरी संघटना आणि वंचित बहुजन आघाडी यांच्यातच तिरंगी लढत झाली. यावेळी चुरशीने झालेल्या या निवडणुकीत ६५ टक्के इतके मतदान झाले आहे. गत वेळी मोदी लाटेत ६३.६८ टक्के इतके मतदानाची नोंद झाली होती. मात्र, गतवेळी पेक्षा यंदा सव्वा टक्क्याने वाढ झाली असून हा वाढलेले मतदानाचा टक्का कोणाला धक्का देणार याबाबत आता राजकीय वर्तुळात जोरदार चर्चा सुरू झाली.
तिरंगी लढतीत कोण होणार खासदार-
भाजपचे विद्यमान खासदार संजयकाका पाटील, काँग्रेस महाआघाडीच्या स्वाभिमानी शेतकरी संघटनेचे विशाल पाटील आणि वंचित बहुजन आघाडीचे गोपीचंद पडळकर यांच्यात काट्याची टक्कर पाहायला मिळाली, तिन्ही उमेदवारांनी मतदारसंघात प्रचाराचा धुरळा उडवून दिला होता. नेहमी या लोकसभेच्या मैदानात दुरंगी रंगणारा सामना यंदा तिरंगी आणि तोही प्रचंड चुरशीची पाहायला मिळाला.
यावेळी या निवडणुकीत सव्वा टक्के अधिक मतदानाची नोंद झाली आहे. त्यामुळे हा वाढलेला मतांचा टक्का कोणाच्या पथ्यावर पडणार याच्या चर्चा गावच्या पारावर रंगु लागल्या आहेत. तर विद्यमान खासदार संजयकाका पुन्हा खासदार होणार ? की विशाल पाटील भाजपला शह देऊन शेतकऱ्यांचे खासदार होणार ? की वंचितचे गोपीचंद पडळकर बाजी मारणार याबाबत राजकीय विश्लेषकही बुचकाळ्यात पडले आहेत. मतदारराजाने आपला कौल ईव्हीएममध्ये बंद केला असून त्यांचा खासदार कोण हे २३ मे'लाच स्पष्ट होईल.
