सांगली - शिवसेनेचाच मुख्यमंत्री व्हावा, यासाठी विठ्ठलाचरणी साकडे घालत, शपथविधी सोहळ्याला बोलवण्याची व्यक्त केलेली शेतकरी दाम्पत्याची इच्छा अखेर उद्धव ठाकरेंनी दिलेल्या शब्दाप्रमाणे पूर्ण केली आहे. सांगलीच्या जतमधील शेतकरी दाम्पत्याला ठाकरे यांनी मुंबईला शपथविधी सोहळ्यासाठी येण्याचे निमंत्रण दिले आहे. त्यानुसार हे दाम्पत्य मुंबईला रवाना झाले आहे.
हेही वाचा - महाराष्ट्राला दुसऱ्यांदा मिळणार मुंबईचा मुख्यमंत्री; मात्र, दोन्ही शिवसेनेचेच
सांगलीच्या जत तालुक्यातील संजय सावंत आणि त्यांची पत्नी रुपाली सावंत हे वारकरी दाम्पत्य शेतकरी आहेत. शिवसेनेचा मुख्यमंत्री व्हावा म्हणून, ५ दिवस निरंकार उपवास करत 85 किलोमीटर अनवाणी पायाने विठ्ठल दर्शनाला हे दोघे पंढरपूरला गेले होते. यादरम्यान, उद्धव ठाकरे 15 नोव्हेंबरला सांगलीमधील खानापूर, कडेगावमधील पावसाने नुकसान झालेल्या शेतीची पाहणी दौऱ्यावर आले होते. त्यावेळी कडेगाव तालुक्यात सावंत यांनी उद्धव ठाकरे यांना भेटून पंढरपूरमधून आणलेली तुळशीची माळ आणि चंद्रभागेमधील तीर्थ भेट दिले होते. यावेळी संजय सावंत यांनी शिवसेनेचा मुख्यमंत्री शपथ घेत असताना मला मंचासमोर जवळ उभं करा, अशी विनंती उद्धव ठाकरे यांच्याकडे केली होती.
त्यावर उद्धव ठाकरे यांनी लगेच तुमचा संपर्क क्रमांक द्या, मी तुम्हाला शपथविधी सोहळ्यात स्टेजजवळ का मंचावर उभं करतो, असे आश्वासन दिले होते. आता उद्धव ठाकरे मुख्यमंत्री होणार हे निश्चित झाल्याने आज पार पडणाऱ्या शपथविधी सोहळ्यासाठी सावंत दाम्पत्याला मतोश्रीवरून निमंत्रण आले आहे. त्यानुसार सावंत मुंबईच्या दिशेने लगेच रवाना देखील झाले आहेत.
हेही वाचा - संध्याकाळी उद्धव ठाकरे घेणार महाविकासआघाडीच्या मुख्यमंत्री पदाची शपथ
नुकसान पाहणी दौऱ्यात अचानक समोर आलेल्या सावंत यांनी व्यक्त केलेली इच्छा व उद्धव ठाकरे यांनी दिलेल्या शब्दाची आठवण ठेवत सावंत यांना शपथविधी सोहळ्याला बोलवून आपला शब्द पाळला आहे.
