सांगली - तासगावजवळ तिहेरी अपघातात दोन जणांचा मृत्यू झाला आहे. तर, दोन जण गंभीर जखमी झाले आहेत. दोन दुचाकी आणि एक चारचाकी वाहनांमध्ये हा भीषण अपघात झाला.
हेही वाचा - प्रवीण दरेकरांची विधान परिषदेच्या विरोधी पक्षनेतेपदी निवड ; 'असा' आहे त्यांचा राजकीय प्रवास
दोन दुचाकींमध्ये पहिल्यांदा समोरासमोर जोरदार धडक झाली आणि त्याचवेळी मागून येणाऱ्या चारचाकी गाडीची एका दुचाकीला धडक बसली. गणेश पाटील व संकेत लिमये अशी मृतांची नावे आहेत. यामधील पाटील हे तासगाव तालुक्यातील ढवळी येथील तर, लिमये हे तासगावमधील रहिवासी आहेत.
तासगाव सांगली रोडवर रविवारी मध्यरात्रीच्या सुमारास हा तिहेरी अपघात झाला. या अपघातात दोघांचा जागीच मृत्यू झाला आहे. यामध्ये अन्य दोन जण गंभीर जखमी झाले आहेत. त्यांच्यावर सांगलीच्या शासकीय रुग्णालयात उपचार सुरू आहेत. तासगाव सांगली रोडवर असणाऱ्या भगवती कोल्ड स्टोरेज समोर हा भीषण अपघात घडला.
