सांगली – टाळेबंदीत खायला मिळत नसल्याने पिसाळलेल्या भटक्या कुत्र्यांनी मिरजमध्ये लहान मुलांवर हल्ला केला. या हल्ल्यात चार लहान मुले जखमी झाले आहेत. जखमी मुलांवर सांगलीच्या सरकारी रुग्णालयात उपचार करण्यात आले आहेत.
मिरज शहरात भटक्या कुत्र्याने हल्ला करून चार लहान मुलांचे लचके तोडले आहेत. शहरातील इदगाह नगर झोपडपट्टटी व मालगाव रोड दत्त नगर याठिकाणी हा प्रकार घडला आहे. रश्मीया नईम मुजावर, आरमान सिकंदर बेपारी व इतर मुले या हल्ल्यात गंभीर जखमी झाले आहेत. त्यांच्यावर सांगलीच्या सरकारी रुग्णालयात उपचार करण्यात आले आहेत.
भटक्या कुत्र्यांचा बंदोबस्त करण्याची नागरिकांची मागणी
सध्या जिल्ह्यात टाळेबंदी सुरू आहे. त्यामुळे खायला अन्न उपलब्ध होत नसल्याने भटके कुत्रे पिसाळून हल्ला करत असल्याचे नागरिकांचे मत आहे. गेल्या काही महिन्यांपासून मिरजेत भटक्या कुत्र्यांची संख्या वाढली आहे. यापुढेही आणखी हल्ले होण्याची शक्यता नाकारता येत नाही. भटक्या कुत्र्यांच्या हल्ल्यामुळे मिरजमधील नागरिकांमध्ये भीतीचे वातावरण पसरले आहे. पालिकेने भटक्या कुत्र्यांचा बंदोबस्त करावा, अशी नागरिकांमधून मागणी करण्यात येत आहे.
