सांगली : सांगली जिल्ह्यातील झालेल्या घरफोडी आणि चोरीचा तपास सुरू होता. त्यावेळी सांगलीच्या स्थानिक गुन्हे अन्वेषण शाखेला जत शहरातील उमदी-जत रोडवरील सिद्धार्थ पब्लिक स्कूलजवळ दोन रेकॉर्डवरील संशयित सोलापूरला चोरीतला मुद्देमाल विक्री करण्यास जाण्यासाठी थांबले असल्याची माहिती मिळाली. त्यानुसार स्थानिक गुन्हे अन्वेषण शाखेच्या पथकाने सदर ठिकाणी सापळा रचला. त्यात किशन ऊर्फ कल्लाप्पा ऊर्फ फांगऱ्या, रतन चव्हाण आणि सुरेश तुळशीराम चव्हाण यांना ताब्यात घेतले. यावेळी त्यांची अंगझडती घेतली असता किशन ऊर्फ कल्लाप्पा याचे पॅन्टच्या खिशात सोन्याची चैन, सोन्याची अंगठी, सोन्याचे गंठण, लहान सोन्याच्या अंगठ्या मिळाल्या. तसेच सुरेश चव्हाण याच्या अंगझडतीमध्ये पॅन्टच्या खिशात सोन्याचे कानातील टॉप्स, एक जोड, दोन अंगठ्या मिळाल्या.
सोन्याचे दागिने लुटल्याची कबुली : त्यानंतर दोघांची चौकशी केली. तेव्हा दोघांनीही सुरुवातीला उडवा उडवीची उत्तरे दिली. नंतर या दोघांचीही सखोल चौकशी केली असता, त्या दोघांनीही सोन्याचे दागिने चोरले असल्याची कबुली दिली. यामध्ये किशन ऊर्फ कल्लाप्पा ऊर्फ फांगऱ्या रतन चव्हाण आणि सुरेश तुळशीराम चव्हाण व अन्य एक साथीदार, असे तिघांनी मिळून कवठे महांकाळ, जत आणि उमदी या ठिकाणी बंद घरांची कुलप तोडून घरफोडी करत सोन्याचे दागिने लुटल्याची कबुली दिली.
सोन्या-चांदीचे दागिने व रोख रक्कम हस्तगत : त्यानंतर त्यांनी लपून ठेवलेले त्यांच्या ताब्यातले सोन्या-चांदीचे दागिने व रोख रक्कम पोलिसांनी हस्तगत केले आहेत. ज्यामध्ये सुमारे आठ लाख 65 हजार किमतीचा सर्व मुद्देमाल जप्त केला. जिल्ह्यातील दहा घरफोड्या उघडकीस आणल्या. किशन ऊर्फ कल्लाप्पा ऊर्फ फांगऱ्या रतन चव्हाण आणि सुरेश तुळशीराम चव्हाण या दोघांना अटक करण्यात आली आहे. पुढील तपासासाठी दोघांना उमदी पोलिसांकडे वर्ग करण्यात आले आहे, अशी माहिती स्थानिक गुन्हे अन्वेषण शाखेचे पोलीस निरीक्षक सतिश शिंदे यांनी दिली आहे.
घरफोडीचे अनेक गुन्हे दाखल : किशन ऊर्फ कल्लाप्पा ऊर्फ फांगऱ्या रतन चव्हाण आणि सुरेश तुळशीराम चव्हाण हे दोघेही रेकॉर्डवरील सराईत गुन्हेगार आहेत. त्यांच्याविरुद्ध विजापुर (ग्रामीण) विजापुर (शहर) तिकोटा, अथणी, बबलेश्वर (कर्नाटक), जत या ठिकाणी अनेक घरफोडीचे गुन्हे दाखल आहेत. सदरची कारवाई ही स्थानिक गुन्हे अन्वेषण शाखेचे सहाय्यक पोलीस निरीक्षक संदीप पाटील यांच्या नेतृत्वाखाली पथकाने केली आहे.
