सांगली - 26 जानेवारी 2001 मध्ये जम्मू काश्मीर येथे जवानांच्या गाडीवर दहशतवाद्यांनी बॉम्ब टाकला. तो बॉम्ब हातात पकडत स्वतःचा जीव देत, कित्येक जवानांचा जीव वाचवणाऱ्या झाकीर रहिमतुल्ला पठाण याच्या कुटुंबीयांकडे सरकारचे अक्षम्य दुर्लक्ष झाल्याचे पाहायला मिळत आहे. या हुतात्मा जवानाची आई आजही मुख्य गावापासून तीन किलोमीटर अंतरावर एका शेतात पडक्या घरात राहते. जिथे गेली वीस वर्षांपासून वीज पोहचलीच नाही. ना ग्रामपंचायत ना शासनाने, कोणीही त्यांच्या या परिस्थितीची दखल घेतली नाही.
हेही वाचा... कर्तबगारीने उंच झेपावलेल्या अन् अज्ञानामुळे पिचलेल्या स्त्रियातील अंतर कमी व्हावे - डॉ. अरुणा ढेरे
वाळवा तालुक्यातील वाटेगाव येथील झाकीर रहिमतुल्ला पठाण, हा जवान आणि त्याची टीम 26 जानेवारी 2001 रोजी जम्मू काश्मीर येथील राष्ट्रध्वजाचा कार्यक्रम संपवून कुपवाडा येथे जात होती. त्यावेळी अचानक दहशतवाद्यांनी गाडीच्या ताफ्यावर बॉंम्ब टाकलेला. तेो बॉम्ब झाकीरने आपल्या हातात झेलून धरला होता. आपल्या सर्व सैनिक मित्रांना त्यानी गाडीतून उड्या टाकायला सांगितल्या. त्यानंतर तो बॉम्ब त्याच्या हातात फुटला, त्यातच झाकीरला वीरमरण आले.
हेही वाचा... के-4 सबमरीन लॉन्चड बॅलेस्टिक क्षेपणास्त्राची यशस्वी चाचणी
आज मात्र, देशातील अनेक जवानांचे प्राण वाचवणाऱ्या त्या हुतात्मा जवानाच्या आईला अंधारात जीवन कंठीत करावे लागत आहे. 21 वर्षांचा पोटचा गोळा गेल्याने त्यावेळी झाकीरच्या आई लैलाबी पठाण ह्या पुरत्या कोलमडून गेल्या होत्या. मुलगा सैन्य दलात असल्याने घरात लैलाबी त्यांचे पती रहिमतुल्ला पठाण आणि सून असा परिवार होता. परंतु झाकीरच्या हौतात्म्यानंतर सून आपल्या माहेरी गेली आणि लैलाबी ह्या आपल्या पतीसोबत वाटेगावापासून तीन किलोमीटर अंतरावर शेतातील एका पडक्या घरामध्ये राहत आहेत.
हेही वाचा... प्रसिद्ध गिर्यारोहक अरुण सावंत यांचा कोकणकड्यावरून पडून मृत्यू
गेली अठरा वर्ष झाली, त्या पडक्या घरात राहत आहेत. पण याहुनही महत्वाची बाब म्हणजे गेली कित्येक वर्षे या घरात वीज देखील पोहचलेली नाही. ना वीजेची सोय ना पाण्याची सोय. त्यातच पाच वर्षांपूर्वी त्यांचे पती देखील स्वर्गवासी झाले. आता लैलाबी या एकट्याच या पडक्या घरात राहतात. अद्याप त्यांना शासनाची किंवा गावातील ग्रामपंचायतीची कोणतीही मदत मिळालेली नाही.
वाळवा तालुका हा क्रांतीवीरांचा तालुका म्हणून ओळखला जातो. मात्र, याच तालुक्यातील एका आईने देशाच्या सेवेसाठी आपल्या पोटचा गोळा अर्पण केला. ती माऊली आज शासनाच्या मदतीकडे डोळे लावून बसली आहे. लैलाबी यांना पेन्शन किंवा हुतात्मा जवानाची आई म्हणून कोणतीही मदत मिळालेली नाही. बरेचदा त्यांनी ग्रामपंचायतीकडे मदतीसाठी याचना केली. परंतु अध्याप कोणीही लक्ष दिलेले नाही.
हेही वाचा... पुणे जिल्ह्यात 'ज्वारीचे पीक' सर्वाधिक रोगराईच्या संकटात
वीस वर्षानंतर पहिल्यांदाच गेल्या दोन दिवसापूर्वी वाटेगाव येथील वाचन चळवळीचे संस्थापक अध्यक्ष राहुल वेदफाटक यांनी माजी सैनिक स्मृती दिनानिमित्त लैलाबी यांचा राष्ट्रध्वज देऊन सत्कार केला. मात्र, देशाच्या सेवेसाठी बलिदान दिलेल्या झाकीर यांचे वाटेगावमध्ये कुठेही नाव दिसून येत नाही. तसेच सैनिकांसाठी लागेल ती मदत करण्याची वलग्ना करणाऱ्यांनी हुतात्मा झाकीर यांच्या मातेकडे मात्र दुर्लक्ष केल्याचे दिसत आहे.
