सांगली - अन्न धान्य बाबतीत नागरिकांनी काळजी करू नये. पुढील तीन महिने पुरेल एवढा साठा राज्यात आहे. त्यामुळे नागरिकांनी घाबरुन जाऊ नये, असे आवाहन कृषी राज्यमंत्री विश्वजित कदम यांनी केले आहे. सांगलीमध्ये कोरोनाच्या पार्श्वभूमीवर आयोजित आढावा बैठकीत ते बोलत होते. यावेळी त्यांनी सांगली जिल्ह्यातील कोरोना बाधित रुग्णांची प्रकृती आणि सर्व परिस्थितीबाबत योग्य खबरदारी घेण्याच्या सूचना अधिकाऱ्यांना दिल्या.
हेही वाचा... कोरोनाचा फटका : स्वगृही परतण्यासाठी मजुराचा पायी प्रवास, दोन दिवसांनी पोहोचला घरी
सांगलीच्या जिल्हाधिकारी कार्यालयात आज (गुरुवार) कृषी राज्यमंत्री विश्वजित कदम यांची आढावा बैठक संपन्न झाली. सांगली जिल्ह्यातील नागरिकांनी कोरोनाच्या परिस्थितीत घाबरून धीर सोडू नये. सरकार आणि प्रशासन नागरिकांच्या पाठीशी खंबीर उभे आहे. जनतेच्या हितासाठी कठोर निर्णय घ्यावे लागले आहेत. येणाऱ्या काही दिवसात नागरिकांना नाईलाजाने काही त्रास सहन करावा लागणार आहे. मात्र, प्रशासनाने घेतलेले निर्णय जनतेच्या हितासाठी आहेत.
प्रशासन योग्य नियोजन करत आहे. कोणीही अन्न धान्य आणि इतर वस्तूंचा साठा करू नये. पुढील तीन महिने पुरेल एवढा अन्न आणि धान्याचा साठा सरकारकडे आहे. त्यामुळे नागरिकांनी काळजी करू नये. तसेच कोणीही गर्दी करू नये, विनाकारण बाहेर फिरू नये, प्रशासनाला सहकार्य करावे, असे आवाहनही विश्वजीत कदम यांनी केले आहे.
हेही वाचा... खळबळजनक; मालेगावात संचारबंदीत रुग्णालयातील डॉक्टर, कर्मचाऱ्यांना धक्काबुक्की
राज्यात अन्न धान्याचा तुटवडा होणार नाही. शेतीमाल संबंधित वाहने कोठेही अडवली जाणार नाहीत. शेतीमाल योग्य ठिकाणी पोहोचवण्याची मुभा देण्यात आली आहे. मात्र, त्याचा कोणीही गैरवापर करू नये. कोणती वाहने सोडायची याचा निर्णय संबंधित तहसीलदार आणि आरटीओच्या अधिकाऱ्यांना देण्यात आले आहेत. त्यामुळे शेतकऱ्यांनी स्थानिक प्रशासनाशी संवाद करावा. त्यावर प्रशासन निश्चित तोडगा काढेल, असे मतही मंत्री कदम यांनी व्यक्त केले आहे.
