सांगली - 'माझे कुटुंब, माझी जबाबदारी' म्हणणाऱ्या राज्य सरकारला आक्रोश करणारे एसटी कर्मचारी आपले कुटुंब वाटत नाही का ?असा प्रश्न भाजपा आमदार गोपीचंद पडळकर यांनी केला आहे. दिवाळीच्या तोंडावर पगारासाठी आंदोलन करायला लावणाऱ्या सरकारला लाज कशी वाटत नाही? अशी टीकाही आमदार पडळकर यांनी केली आहे.
एसटी कर्मचाऱ्यांकडे सरकारचे दुर्लक्ष -
गेल्या तीन महिन्यांपासून एसटी कर्मचाऱ्यांचे वेतन थकलेले आहे. सध्या दिवाळी सण तोंडावर आहे. त्यामुळे एसटी कर्मचाऱ्यांनी थकीत वेतन, सणासाठी उचल यासह विविध मागण्यांसाठी आज राज्यभर आंदोलन छेडले. एसटी कर्मचाऱ्यांच्या या आंदोलनावरून भाजपाचे प्रवक्ते व आमदार गोपीचंद पडळकर यांनी राज्यसरकारवर जोरदार टीका केली. कोरोनाच्या संकट काळात अत्यावश्यक सेवा म्हणून एसटी कर्मचाऱ्यांनी जीव धोक्यात घालून काम केले. ज्यामध्ये 80 एसटी कर्मचाऱ्यांचा मृत्यूही झाला. त्यापैकी केवळ 6 कर्मचाऱ्यांना मदत मिळाली. इतरांना अद्याप मदत मिळालेली नाही. ऑगस्टपासून एसटी कर्मचाऱयांना पगार दिला नाही. याउलट मुंबईत बेस्टच्या कर्मचाऱ्यांना सानुग्रह अनुदान जाहीर करण्यात आले आहे. सरकारचा हा कुठला न्याय आहे, असे पडळकर म्हणाले.
सरकारसाठी ही लाजिरवाणी बाब -
कायद्यानुसार महागाई भत्ता, सण उचल देने बंधनकारक आहे. मात्र, याकडे सरकारने दुर्लक्ष केले. राज्यातील एसटी कर्मचाऱ्यांना हक्काच्या पगारासाठी आपल्या कुटुंबासहित आक्रोश करावा लागला. ही सरकारसाठी लाजिरवाणी गोष्ट आहे, अशी टीका पडळकर यांनी केली.
एसटी कर्मचाऱ्यांचे कुटुंब जबाबदारी नाही का ?
राज्य सरकार 'माझे कुटुंब, माझी जबाबदारी', अशी घोषणा करत आहे. दुसऱ्या बाजूला एसटी कर्मचाऱयांच्या कुटुंबाला आंदोलन करायला लावत आहे. एसटी कर्मचाऱ्यांचे कुटुंब सरकाराची जबाबदारी नाही का? असा प्रश्न पडळकर यांनी उपस्थित केला.
काही तासातच मिळणार वेतन -
प्रलंबित वेतन मागणीसाठी एसटी कर्मचाऱ्यांनी आज राज्यभर आक्रोश आंदोलन केले. त्यानंतर राज्याचे परिवहन मंत्री अनिल परब यांनी पत्रकार परिषद घेऊन काही तासातच एसटी कर्मचाऱ्यांना एका महिन्याचे वेतन देण्याची घोषणा केली आहे. तर, आणखी एका महिन्याचे वेतन या आठवड्यात दिले जाईल. कर्मचाऱ्यांना दिवाळीसाठी अग्रिम रक्कमही दिली जाणार आहे.
