सांगली - अभिनेत्री दिपाली भोसले-सय्यद हीने कोल्हापूर आणि सांगलीतील पूरग्रस्तांच्या मुलींच्या लग्नाचा खर्च उचलण्याची घोषणा केली आहे. सामूहिक विवाह सोहळ्यात १ हजार मुलींचा विवाह लावून दिला जाणार आहे. तसेच प्रत्येक मुलीच्या नावे ५० हजार रुपये जमा केले जाणार असल्याचे दिपालीने सांगितले. शनिवारी सांगलीतील पूरस्थिती पाहणी केल्यानंतर ती बोलत होती.
सांगलीचा महापूर ओसरला आहे. या महापुराच्या पार्श्वभूमीवर अनेक सेलिब्रेटी सांगलीकडे मदतीसाठी धाव घेत आहेत. आज मराठी अभिनेत्री दिपाली सय्यद- भोसले हिने सांगली शहरातल्या पूर परिस्थितीची पाहणी केली. यावेळी शहरातील मारुती चौक, हरभट रोड, सांगलीवाडी या ठिकाणी पूरस्थितीची पाहणी केली. दिपालीने पूरग्रस्तांशी संवाद साधला.
अनेक नागरिकांच्या घरांपर्यंत आजही धान्य आणि सरकारची मदत पोहोचली नाही. काही ठिकाणी मोठ्या प्रमाणात ही मदत पोहोचली आहे, तर काही ठिकाणी मदत अद्यापही पोहोचली नाही. त्यामुळे सरकारने ही मदत प्रत्येक पूरग्रस्तांपर्यंत कशी पोहोचेल? याबाबत नियोजन केले पाहिजे, असे दिपाली म्हणाली.
व्होट बँक आणि राजकारणासाठी या परिस्थितीचा उपयोग होता कामा नये. पूरग्रस्तांना मदत कशी मिळेल? याचा सर्वांनी विचार केला पाहिजे. या पूरस्थितीमुळे सांगली आणि कोल्हापूर जिल्ह्यातील अनेक मुलींच्या लग्नाचा प्रश्न त्यांच्या पालकांसमोर निर्माण झाला आहे. मात्र, या सांगली-कोल्हापूर जिल्ह्यातील एक हजार मुलींच्या लग्नाचा खर्च उचलणार असल्याचे दिपालीने जाहीर केले आहे. तसेच प्रत्येक मुलीच्या नावे 50 हजार रुपये डिपॉझीट म्हणून जमा केले जाईल, असेही दिपालीने स्पष्ट केले. तसेच या पूरग्रस्त मुलींची आई म्हणून भूमिका निभावणार असल्याचे तिने सांगितले.
