सांगली - महापालिकेकडून महापालिका क्षेत्रातील अतिक्रमणांच्या विरोधात मोहीम सुरू करण्यात आली आहे. गेल्या दोन दिवसात मनपाने धडक कारवाई करत शहरातील सुमारे 150हून अधिक ठिकाणचे अतिक्रमण हटवण्यात आले आहेत.
सांगली महापालिका शहरातील प्रमुख मार्गावर व्यापारी, व्यावसायिकांनी आपल्या दुकांनाच्या बाहेर शेड, बोर्ड त्याचप्रमाणे पत्रे मारून अतिक्रमण केले आहे. त्यामुळे प्रमुख मार्गावरील रस्ते मोठे आहेत. मात्र, या अतिक्रमणामुळे वाहतूककोंडीला सामोरे जावे लागत होते. याचबरोबर अनेक फुटपाथवरसुद्धा अतिक्रमणे करण्यात आली असल्याने नागरिकांना चालणेही मुश्किल झाले होते. याची गंभीर दखल घेत महापालिका आयुक्त नितीन कापडणीस यांनी मुख्य मार्गावरील आणि फुटपाथवरील अतिक्रमणे हटविण्याचे आदेश प्रशासनाला दिले होते.
त्यानुसार गेल्या दोन दिवसांपासून अतिक्रमण विभागाच्या पथकाकडून कापडपेठ, मारुती रोड, बालाजी चौक, बसस्थानक परिसर, रिसाला रोड, हिराभाग कॉर्नर परिसरात अतिक्रमण मोहीम राबवित या मार्गावरील दुतर्फा असणारी अतिक्रमणे जेसीबीच्या साह्याने हटविण्यात आली आहेत. यामध्ये बेकायदा उभारलेले शेड, व्यवसायाचे बोर्ड तसेच लोखंडी बोर्ड पथकाने काढले आहेत. पोलीस बंदोबस्तात ही मोहीम सुरू आहे.
या मोहिमेमुळे रस्त्यावरील अतिक्रमणे निघाल्याने रस्ते आता मोठे आणि विस्तीर्ण दिसत आहेत. याचबरोबर येथील खोली धारकांनासुद्धा उभारलेले शेड आणि कट्टेसुद्धा अतिक्रमण विभागाने काढले आहेत.
