रत्नागिरी - आपल्या नेत्यांसाठी कार्यकर्ते नेमकं काय करतील याचा काही नेम नाही. शिवसेना उपनेते व रत्नागिरी विधानसभा मतदारसंघातील शिवसेनेचे उमेदवार उदय सामंत यांच्यावरील निष्ठा आणि प्रेमापोटी इलियास साखरकर यांनी हटके हेअरस्टाईल केली आहे.
इलियास यांनी आपल्या डोक्यावर शिवसेनेची निशाणी धनुष्यबाण आणि उदय सामंत यांचं नाव कोरून घेतलं असून, आमदार उदय सामंत यांच्या प्रचारासाठी इलियास यांनी हा हटके फंड वापरला आहे.
उदय सामंत यांनी आमच्या भागात अनेक विकासकामे केली असल्याचे इलियास सांगतात. विशेष म्हणजे एखाद्या कार्यकर्त्याशी त्यांचं एक वेगळं भावनिक नातं असतं, असे इलियास म्हणाले. माझ्याही अडीअडचणीला उदय सामंत नेहमी धावून येत असतात. त्यामुळे मी हे जे काही केलं आहे, ते केवळ प्रेमापोटी केलं असल्याचं इलियास म्हणतात.
विशेष म्हणजे इलियास हे उदय सामंत जिथे जिथे प्रचाराला जातात तिथे त्यांच्या सोबत जातात. त्यांच्या या हेअर स्टाईलमुळे अनेक लोक त्यांना बघण्यासाठी मोठी गर्दी करतात. इलियास साखरकर यांच्या या वेगळ्या प्रकारच्या केशरचनेची चर्चा सध्या रत्नागिरीत जोरदार सुरू आहे.
